ԱԺ-ում «պատմական օր» կլինի
«Ազգային ժողովի կանոնակարգ» ՀՀ օրենքում լրացում և փոփոխություն կատարելու մասին օրինագիծը ,որի հեղինակներն են «Ժառանգություն» խմբակցության պատգամավորներ Զարուհի Փոստանջյանը, Թևան Պողոսյանը և Ռուբիկ Հակոբյանը, ԱԺ նիստում երկրորդ ընթերցմամբ քննարկվեց ,որով կարգազանց են համարվում այն պատգամավորները, ովքեր նիստի ընթացքում գրանցվում կամ քվեարկում են բացակա պատգամավորի փոխարեն: Իմ պատգամավորության 9 տարիների ընթացքում սա առաջին օրինագիծն է, որ կընդունվի, քանի որ համաձայնեցվել է ԱԺ-ում ներկայացված բոլոր ուժերի հետ:Ենթադրում էի, որ իմ դերակատարումը ավելի մեծ կլինի ԱԺ-ում,հայտարարեց Փոստանջյանը: ՀՀԿ-ական պատգամավոր Լևոն Մարտիրոսյանը «պատմական օր» անվանեց այս օրը, երբ կընդունվի Զ.Փոստանջյանի հեղինակած առաջին օրինագիծը: ՀՀԿ-ական պատգամավոր, ԱԺ էթիկայի հանձնաժողովի նախագահ Խոսրով Հարությունյանը շտապեց հայտարարել, որ, բացի ուրիշի փոխարեն քվեարկելուց, կարգազանցություն է ուրիշին քվեարկելու հնարավորությունից զրկելը: Ըստ նրա` կարելի է ավելի խիստ պատժամիջոցներ կիրառել, ընդհուպ զրկել ոչ միայն ձայնից, այլ նիստին մասնակցութունից.«Եթե առաջարկը կառուցողական է, ապա անկախ նրանից, թե ով է դրա հեղինակը, ստանում է ԱԺ աջակցությունը»: ԱԺ փոխխոսնակ Էդուարդ Շարմազանովը կոչ արեց միմյանց լսելու, անձերի դեմ հանդես չգալու, զեկուցողներին լսելու, իշխանության ներկայացուցչի վրա չբղավելու. «Ես ուզում եմ, որ իմ, բոլորիս երեխաներն ապրեն ավելի բարեկիրթ Հայաստանում, իսկ ԱԺ-ն այն տեղն է, որտեղ պետք է այդ նշաձողը սահմանվի: Շատ դեպքերում պետք չի գռեհիկությանը գռեհիկությամբ պատասխանել, այլ պետք է բարեկրթությամբ պատասխանել»:
Հետևեք մեզ Viber-ում
