Աշխատակիցների շրջանում վախի մթնոլորտ է ստեղծվել. Բաց նամակ՝ Մանե Թանդիլյանին

«Մարի Իզմիրլյանի անվան մանկատուն» ՊՈԱԿ-ի աշխատակիցները բաց նամակով դիմել են Աշխատանքի և սոցիալական հարցերի նախարար Մանե Թանդիլյանին. «Հարգելի՛ տիկին Թանդիլյան, Ձեզ են դիմում ՀՀ աշխատանքի և սոցիալական հարցերի նախարարության «Մարի Իզմիրլյանի անվան մանկատուն» ՊՈԱԿ-ի աշխատակիցները։ Մեր դժգոհությունը տնօրենի ժամանակավոր պաշտոնակատար Լիլիթ Հակոբյանի դեմ է։ Նրան 2017 թվականի նոյեմբերի 1-ին տնօրենի ժամանակավոր պաշտոնում են նշանակել և կարճ ժամանակահատվածում պարզ դարձավ, որ Լիլիթ Հակոբյանը չունի նման մասնագիտական կարողություններ ու փորձ, որպեսզի ղեկավարի մի հաստատություն, որտեղ խնամվում է հատուկ կարիք ունեցող շուրջ 100 երեխա, և կառույցն ունի շուրջ 120 աշխատող: Աշխատած կարճ ամիսների ընթացքում նա պաշտոններից ազատում է աշխատանքի երկար տարիների փորձ ունեցող շուրջ 20 աշխատողի՝ գլխավոր հաշվապահի, պահեստապետի, տնտեսվարի, դաստիարակների և դայակների՝ խաթարելով երեխաների խնամքի բնականոն ընթացքը, գրությունները և մակագրությունները կատարում է բազմաթիվ կոպիտ տառասխալներով, երեխաների խմբեր ընդհանրապես չի մտնում և երեխաների հետ չի շփվում: Նա որևէ երեխայի անուն չգիտի կամ նրանց հիվանդություններից տեղյակ չէ։ Աշխատակիցների շրջանում վախի մթնոլորտ է ստեղծել՝ սպառնալով ազատել աշխատանքից ամենաթեթև զանցանքի համար, նա ազատված աշխատակիցներին փոխարինել է իր ծանոթ-բարեկամներով։ Մեզ հասած տեղեկությունների համաձայն՝ տնօրենի ժամանակավոր պաշտոնակատարին նշանակելու համար միջնորդել են նրա բարեկամները՝ Հայաստանի Հանրապետական կուսակցության բարձրաստիճան անդամներ: Նրան հովանավորում են նաև նախարարության բարձրաստիճան պաշտոնյաներ և խախտելով ՀՀ կառավարության 2005 թվականի հունվարի 25-ի որոշմամբ հաստատված N 1 հավելվածի 11.3 և 11.4 կետերի պահանջները՝ նրա պաշտոնավարման ժամկետը երկարացրել են ևս 6 ամիս ժամկետով: Ընդ որում, մեկ օրով ազատել են աշխատանքից և այնուհետև ընդունել ժամանակավոր պաշտոնակատարի պաշտոնում ևս 6 ամիս ժամկետով: Ակնկալում ենք՝ հետամուտ լինել նշված գործընթացին և այսուհետ բացառել խախտումներով տնօրենների նշանակման, պաշտոնատար անձանց դիրքի չարաշահման դեպքերը: «Մարի Իզմիրլյանի անվան մանկատուն» ՊՈԱԿ-ի մի խումբ աշխատակիցներ»: