Երեխան մեր մոտից ուրախ գնաց.9 ամսական փոքրիկի մահվան պատճառը

Մարտի 9-ին Լոռու մարզի Շնող գյուղում 9 ամսական աղջիկ է մահացել, որն, ըստ նախնական ախտորոշման, լեյշմանիոզ հիվանդությամբ է վարակված եղել: «Դա ինֆեկցիոն հիվանդություն է, որի ժամանակ ներքին օրգանները` փայծաղը, լյարդը, մեծանում են: Երեխային մեզ մոտ են բերել փետրվարի 17-ին՝ 37.2 աստիճան ջերմությունով: Քանի որ ուրբաթ էր, ծնողներն, ապահովության համար, նրան փետրվարի 19-ին 38.3 աստիճան ջերմությամբ տեղափոխել են Ալավերդու ԲԿ, այնուհետև՝ Երևանի «Մուրացան» հիվանդանոց: Այնտեղ էլ մնացել է 7-8 օր: Երեխան մեր մոտից գնացել է ուրախ, խաղալով: Մեր բժշկական կենտրոնում նա եղել է ընդամենը մեկ օր»,- Հայելի.am-ի թղթակցի հետ զրույցում ասաց Շնող գյուղի ամբուլատորիայի ընտանեկան բժշկուհի Կարինե Սահակյանը: Բժշկուհին ասաց, որ այս հիվանդության նմանվող  դեպքեր գյուղում մեկ անգամ չէ, որ արձանագրվել են: «Այս հիվանդությունը կենդանիներից կարող է անցնել, օրինակ՝ շներից, գայլերից: Արյան մեջ է լինում և մոծակի միջոցով կարող է փոխանցվել, նույնիսկ հիվանդ մարդուց: Մոծակների արյան մեջ այն կարող է 23-24 ամիս մնալ»,- եզրափակեց Կարինե Սահակյանը:   Աստղիկ Ավագյան