Ստուգողական այցեր. Ամենատանջող հարցի պատասխանին սպասելիս
ԵԱՀԿ Մինսկի խումբը համանախագահող Միացյալ Նահանգների և Ֆրանսիայի բարձրաստիճան պաշտոնյաներն այս օրերին Երևանում էին: Եվրոպայի և Եվրասիայի հարցերով ԱՄՆ պետքարտուղարի փոխտեղակալ Բրիջիթ Բրինքն անցած օրերին Հայաստան էր ժամանել: Նա հանդիպել է նոր կառավարության և քաղաքացիական հասարակության հետ: Հայաստանում Միացյալ Նահանգների դեսպանության հաղորդագրության համաձայն՝ Նիկոլ Փաշինյանի հետ իր առաջին հանդիպման ընթացում Բրիջիթ Բրինքը շնորհավորել է նրան այդ պաշտոնում ընտրվելու և իշխանության խաղաղ փոխանցման համար, ողջունել է վարչապետի ստանձնած հանձնառությունը՝ ուղղված կոռուպցիայի դեմ պայքարին, և առաջարկել է ԱՄՆ-ի շարունակական աջակցությունը հակակոռուպցիոն աշխատանքներում, ասված է հաղորդագրությունում: Պետքարտուղարի փոխտեղակալն արտգործնախարար Զոհրաբ Մնացականյանի հետ քննության է առել երկկողմ հարաբերությունների մի շարք հարցեր: Նա շեշտել է, որ Միացյալ Նահանգները հանձնառու է աշխատել նոր կառավարության հետ՝ երկկողմ կապերի ամրապնդման և դեպի Հայաստան հավելյալ ամերիկյան ներդրումների ներգրավման ուղղությամբ: Բրինքը նկատել է, որ Հայ-ամերիկյան միջկառավարական աշխատանքային խումբը կարող է հարթակ հանդիսանալ նպատակների փոխադարձ առաջխաղացման հարցում իրական տեղաշարժեր ապահովելու համար: Ամերիկացի բարձրաստիճան դիվանագետը նշել է, որ Միացյալ Նահանգները որպես ԵԱՀԿ Մինսկի խմբի համանախագահ շարունակելու է աջակցել Լեռնային Ղարաբաղի հակամարտության խաղաղ բանակցային կարգավորմանը և կողմերի հետ ակտիվորեն աշխատելու է Մինսկի խմբի գործընթացի շրջանակում խաղաղ լուծում գտնելու ուղղությամբ: Նախագահ Արմեն Սարգսյանի հետ հանդիպման ժամանակ Բրիջիթ Բրինքը գովեստով է արտահայտվել վերջին շրջանի բողոքի ակցիաների խաղաղ հանգուցալուծմանը նպաստելու նրա ջանքերի մասին: Նա շեշտել է, որ Միացյալ Նահանգները շարունակելու է գործակցել Հայաստանի կառավարության հետ այնպիսի ծրագրերի շրջանակում, որոնք Հայաստանի ժողովրդի համար ձևավորում են տնտեսական հնարավորություններ, ամրապնդում են ժողովրդավարական հաստատությունները և բարելավում կենսամակարդակը: «Ամեն անգամ հաճույքով եմ գալիս Հայաստան, և այս այցի ընթացքում էլ այն կրկին աչքի ընկավ իր ամենաազդեցիկ ու ամենակարևոր ռեսուրսով՝ իր մարդկանցով: Ինձ ոգևորում է հայ ժողովրդի ոգին ու կորովը, և ես հատկապես տպավորված եմ ձեզնով՝ Հայաստանի երիտասարդ առաջնորդներով, ովքեր այսպիսի մեծ նվիրումով ու ջանասիրությամբ ձգտում են կերտել իրենց երկրի պայծառ ապագան», - ասել է Բրիջիթ Բրինքը երիտասարդ առաջնորդների հետ հանդիպման ընթացքում: Երեկ Երևանում էր Ֆրանսիայի արտգործնախարար, որն էլ փաստեց, որ Հայաստանը իր պատմության շրջադարձային փուլում է: ԵԱՀԿ Մինսկի խմբի համանախագահ Ֆրանսիայի արտգործնախարար Ժան-Իվ Լը Դրիանը Երևանում հայտարարել է, որ Ղարաբաղյան հակամարտության հարցում ո՛չ ստատուս քվոն, ո՛չ ուժի կիրառումը ընդունելի չեն, և պետք է ավելի պրագմատիկ և կրեատիվ ձևով մոտենալ հարցին։ Հայաստանի արտգործնախարար Զոհրապ Մնացականյանի հետ համատեղ հայտարարության ժամանակ նա Ղարաբաղի հարցին այլևս չանդրադարձավ, փոխարենը հայտարարեց, որ հպարտ է՝ ինքը առաջին արտգործնախարարն է, ով այցելում է նոր Հայաստան և հանդիպում է Հայաստանի նոր ղեկավարների հետ։ Նրա խոսքով, Ֆրանսիան շարունակելու է մնալ Հայաստանի կողքին և աջակցելու է ժողովրդավարության կառուցման գործում․ - «Հայաստանը իր պատմության շրջադարձային փուլում է, և սա ոչ թե [Առաջին] հանրապետության հարյուրամյակի, այլ Հայաստանում տեղի ունեցած վերջին իրադարձությունների իմաստով: Մենք ողջունում ենք այն պատասխանատվությունը, որը դրսևորեցին քաղաքական ուժերը և ժողովուրդը, ինչի արդյունքում էլ Հայաստանը մայիսի 8-ին նոր վարչապետ ունեցավ»։ Նա փոխանցեց, որ քննարկել են նաև Հայաստան - Եվրամիություն հարաբերությունները․ Ֆրանսիան այս հարցում ներգրավված է և Համապարփակ ու ընդլայնված գործընկերության համաձայնագիրը, որ ստորագրվել է Հայաստանի հետ, եզակի է։ Հայաստան ժամանած Միացյալ Նահանգների և Ֆրանսիայի բարձրաստիճան պաշտոնյաների ստուգողական այցերն, իհարկե, միանգամայն տրամաբանական են: Փաշինյանի նոր կառավարության հետ համագործակցության սահմանները Հայաստանի գործընկերները պետք է փորձեն հասկանալ առաջիկա շաբաթներին ու ամիսներին: Մանավանդ հիմա, երբ Փաշինյանը կենտրոնացել է Ռուսաստանի հետ հարաբերությունները արժևորելուն՝ արևմտյան պաշտոնյաները փորձում են հասկանալ, թե Հայաստանի նոր կառավարությունը, Փաշինյանի թիմը որքանով է անկեղծ իրենց հետ հարաբերությունները զարգացնելու հարցում, ինչպես է առաջնորդվելու: Ու թերևս, ամենագլխավոր հարցը, որ կա Հայաստանի գործընկերների մոտ, սա է՝ Հայաստանը կարո՞ղ է զրկվել Ռուսաստանի ազդեցության տակ գտնվողի իր պիտակից... Թամար Բագրատունի
Հետևեք մեզ Viber-ում
