Սադրում են, ուզում են մեզ տրամադրել այսօրվա իշխանությունների դեմ. Ժիրայր Սեֆիլյանի եղբայր

Վերաքննիչ դատարանը մայիսի 30-ին հետաձգեց 10 տարի 5 ամիս ժամկետով դատապարտված Ժիրայր Սեֆիլյանի, Գևորգ Սաֆարյանի, Գալուստ Գրիգորյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Ներսես Պողոսյանի գործով պաշտպանների բողոքարկումների քննումը: Դատարանը հայտարարեց, որ գրություն են ստացել, որ ամբաստանյալներին հնարավոր չէ եղել տեղափոխել դատարան: Ժիրայր Սեֆիլյանի և մյուս ամբաստանյալների կողմնակիցները դժգոհություն հայտնեցին և չցանկացան լքել դատարանի շենքը: «Այս գործողություններով նախկին իշխանությունները մեղքը գցում են ոստիկանների վրա: Դա միտումնավոր է արվել: Այս արարքով նրանք ուզում են մեզ տրամադրել այսօրվա իշխանությունների դեմ, մեզ հանել նրանց դեմ, սադրանք առաջացնել»,- հայտարարեց Ժիրայր Սեֆիլյանի եղբայր Թորոս Սեֆիլյանը: Մարտի 20-ին առաջին ատյանի դատարանը Ժիրայր Սիմոնի Սեֆիլյանին մեղավոր էր ճանաչել ՀՀ Քրեական օրենսգրքի միանգամից երեք հոդվածներով՝ զանգվածային անկարգություններ նախապատրաստելու, ապօրինի զենք ձեռք բերելու, պահելու, փոխադրելու և շենքեր, շինություններ գրավելու նախապատրաստության համար: Նա դատապարտվել էր ազատազրկման 10 տարի 6 ամիս ժամկետով: Գևորգ Սաֆարյանը դատապարտվել էր 5 տարի 5 ամիս ազատազրկման, Ներսես Պողոսյանը՝ 3 տարի 5 ամիս, Արցախյան պատերազմի մասնակիցներ Հրայր Թոփչյանն ու Սասունիկ Կիրակոսյանը, դուդուկի ուսուցիչ Գալուստ Գրիգորյանը՝ 3-ական տարվա ազատազրկման: