«Սերժիկ Ավետիսյան, Ձեր հայտարարությունը, թե Բաղրամյան 26-ից որևէ զանգ չի եղել, հավատ չի ներշնչում». Երեմ Սարգսյան

20:15 - 28/մայիսի/2018

ՀՀ վճռաբեկ դատարանի քրեական պալատի նախագահ Սերժիկ Ավետիսյանը «Շանթ»-ի եթերից պաշտոնապես հայտարարում է, որ 2001 թվականից դատական համակարգում է և մինչ օրս երբևէ իրեն որևէ զանգ չի եղել Բաղրամյան 26-ից: Վստահաբար պնդում է նաև, որ նման երևույթներ քրեական պալատում չեն եղել և չկան: Լրիվ ՀՀԿ-ի ստիլն է. բոլորը տեսնում են իրականությունը, սակայն իրենք նայելով բոլորի աչքերի մեջ, բացահայտորեն հակառակն են պնդում: Պարոն Սերժիկ Ավետիսյան, Բաղրամյան 26-ը դեռ մի կողմ թողնենք, բնականաբար Ձեր պաշտոնապես արված հայտարարությունը ոչ մեկի մոտ հավատ չի ներշնչում, քանի որ բացահայտ իրականությունը բոլորը գիտեն, այդ թվում` Դուք: Ախր քրեական պալատն իր նախկին նախագահով և Վճռաբեկ դատարանի նախագահով հանդերձ ահ ու սարսափ էր ապրում ոչ միայն Բաղրամյան 26-ից, այլև այն ժամանակվա Երևան քաղաքի դատախազ, հետագայում նաև ՀՀ գլխավոր դատախազի տեղակալ Հրաչիկ Բադալյանից: Երևի հիմա էլ, որ այդ անունը լսում եք, իսկույն զգոնանում եք: Հրաչիկ Բադալյանը յուրաքանչյուր գործի ելք ի զորու էր լուծել ՀՀ վճռաբեկ դատարանի քրեական պալատում: Ավելին, նույնիսկ արդեն իսկ վարույթ ընդունված վճռաբեկ բողոքը մերժվում էր ծիծաղելի և բացարձակ անհիմն պատճառաբանություններով միայն այն բանի համար, որ Հրաչիկ Բադալյանը զանգել և նման պահանջ էր ներկայացրել: Անհրաժեշտության դեպքում վարույթ ընդունելու և հետագայում այն մերժելու վերաբերյալ որոշումները կներկայացնեմ, ինքներդ կգնահատեք մերժման պատճառաբանությունների ակնհայտ անհիմն և անօրինական լինելը: Բնականաբար, էլի կարող եք պաշտոնապես հայտարարել, որ նման երևույթներ չեն եղել, սակայն այդպիսի փաստերը բազմաթիվ են: Երեմ Սարգսյան