Հայաստանում գրանցված ավիաընկերությունը կասկածվում է ՄԱԿ-ի էմբարգոն խախտելու մեջ. «Ազատություն»

Հայաստանում գրանցված ավիաընկերությունը կասկածվում է ՄԱԿ-ի էմբարգոն խախտելով Լիբիա զենք մատակարարելու մեջ: ՄԱԿ-ի զեկույցում նշված է, որ ուսումնասիրվում է Հայաստանի մայրաքաղաք Երևանում գրանցված Veteran Avia ընկերության կողմից իրականացված չվերթը: Կասկածվում է, որ այս ընկերությունը Արաբական Միացյալ Էմիրություններից երրորդ երկրի՝ Հորդանանի վրայով զենք ու զինամթերք է մատակարարել Լիբիայի Տոբրուկի ռեժիմին: Հայաստանում գրանցված այս ընկերության կառավարումը իրականացվում է Էմիրությունների Շարժա քաղաքից: Veteran Avia-ն հասանելի չի եղել մեկնաբանություններ, պարզաբանումներ ստանալու համար, սակայն Հայաստանի կառավարության պաշտոնյաները ՄԱԿ-ի ուսումնասիրողներին ասել են, թե ավիաընկերությունը հաստատում է, որ Միացյալ Արաբական Էմիրություններից Հորդանանի վրայով բեռնափոխադրում է իրականացրել Լիբիա, սակայն նրանք պնդել են, որ դա մարդասիրական օգնություն էր: The Wall Street Journal-ի փոխանցմամբ՝ այս մանրամասները հայտնել է իրավիճակին ծանոթ ՄԱԿ-ի պաշտոնյան: Պարբերականը նշում է, որ ՄԱԿ-ի զեկույցը հունվարին ներկայացվել է ՄԱԿ-ի Անվտանգության խորհրդին և շուտով հրապարակային է դառնալու: Զեկույցն արձանագրում է, որ շատ երկրներ, անհատներ և ընկերություններ խախտել են Լիբիային զենք մատակարարելու արգելքը: Անվտանգության խորհուրդը հիմա ուսումնասիրում է զեկույցի փաստերն ու ապացույցները՝ որոշելու համար, թե ինչ գործողությունների դիմի էմբարգոն խախտած երկրների կամ անհատների դեմ: Լիբիայում երկար ժամանակ շարունակվում է քաղաքացիական պատերազմը: Դեռ 2011 թվականից՝ «արաբական գարնան» ժամանակներից, ՄԱԿ-ը արգելել էր զենքի և զինամթերքի մատակարարումը Լիբիա: Բռնակալ Քադաֆիի տապալումից հետո քաղաքացիական մի նոր պայքար է սկսվել: 2014 թվականից իշխանության երկու թևերն ու նրանց աջակցող զինված խմբերը պայքարում են՝ վերահսկելու համար նավթով հարուստ երկիրը: Մայրաքաղաք Տրիպոլիի և հակառակ կողմի՝ Տոբրուկի իշխանություններից յուրաքանչյուրը աջակիցներ և դաշնակիցներ ունի դրսում, որոնք հնարավոր է զենք-զինամթերք են ուղարկում նրանց: Մանրամասներին կարող եք ծանոթանալ` «Ազատություն» ռ/կ-ի կայքում