Վարչապետը խախտեց «Լեզվի մասին» ՀՀ օրենքը. iravunk.com

Հիշո՞ւմ եք, որ ընդամենը մի քանի տարի առաջ դեռեւս ԱԺ ընդդիմադիր պատգամավոր ՆԻԿՈԼ ՓԱՇԻՆՅԱՆԸմեծ աղմուկ էր բարձրացրել՝ նշելով, որ խախտվել է Լեզվի մասին պետական օրենքը: Նա դատապարտել էր, որ Ազգային ժողովում Հայ-ռուսական բարեկամական խորհրդարանական ակումբի նիստին ռուս քաղաքական վերլուծաբան, «Ռուսաստանն այսօր» տեղեկատվական գործակալության գլխավոր տնօրեն Դմիտրի Կիսիլյովի հետ մասնավոր զրույցներում հայ պատգամավորները խոսել են ռուսերեն: Եվ ուրեմն՝ այդ օրվանից շատ չանցած՝ արդեն, որպես ՀՀ վարչապետ, այսօր Նիկոլ Փաշինյանը «UWC Դիլիջան» միջազգային դպրոցի շրջանավարտների ավարտական միջոցառման ժամանակ ի պաշտոնե բեմից ելույթ ունենալով՝ խոսեց ո՛չ ավել, ո՛չ պակաս իր «կոտրտված» անգլերենով, ընդ որում՝ առանց համաժամանակյա հայերեն թարգմանության: Գուցեեւ սա կարելի էր համարել տեխնիկական խնդիր, եթե խոսքը չգնար էլիտար այն դպրոցի մասին, որտեղ պայմաններն ապահոված են ամենաբարձ մակարդակով: Իսկ դպրոցի հիմնադիրներից գործարար ՌՈՒԲԵՆ ՎԱՐԴԱՆՅԱՆԻ ձեռքն էլ, ինչպես ժողովուրդը կասեր, «քարի տակ չէ», որ գոնե թարգամանիչ սարքերով ապահովեր դահլիճը: Ինչեւէ, մեզ մնում է հիշեցնել «Լեզվի մասին» ՀՀ օրենքի 4-րդ հոդվածի «բ» կետը, որտեղ սահմանված է, որ համագումարներում, նստաշրջաններում, ժողովներում, գիտաժողովներում, հրապարակային ատենախոսությունների եւ պաշտոնական ու զանգվածային այլ միջոցառումների ժամանակ պետք է ապահովվի ոչ հայերեն ելույթներին զուգահեռ հայերեն թարգմանությունը։ Այնպես որ, այս դրույթին հակասող ցանկացած երեւույթ կամ քայլ համարվում է հակաօրինական: