Հայաստանը թույլ չի տալու դիրքային փոփոխություն սահմանի որևէ հատվածում.Տիգրան Բալայան

«Հայաստանը թույլ չի տալու դիրքային փոփոխություն սահմանի որևէ հատվածում : Ինչպես Պաշտպանության նախարարության իմ գործընկերն արդեն տեղեկացրել է, այդ հատվածում վարվում են որոշակի աշխատանքներ, որոնք անմիջական վտանգ են ստեղծում մեր դիրքերի համար:Հենց դրանց տեղում ծանոթանալու համար է, որ Պաշտպանության նախարար Դավիթ Տոնոյանն ու ԱԳ նախարար Զոհրաբ Մնացականյանն այցելել են սահմանային այդ հատված», - լրագրողների հետ ճեպազրույցում ասաց ՀՀ ԱԳՆ մամուլի քարտուղար Տիգրան Բալայանն` անդրադառնալով հայ-ադրբեջանական սահմանի նախիջևանյան հատվածում որոշակի լարվածությանը: «Մենք բազմիցս, թե՛ ադրբեջանական կողմին, թե՛ միջնորդներին զգուշացրել ենք, որ այդ տիպի աշխատանքները լարում են իրավիճակը և կարող են հանգեցնել անցանկալի զոհերի: Ասել, որ Հայաստանի Պաշտպանության և Արտաքին գործերի նախարարների անմիջական ցուցումով է եղել այն հրաձգությունը, որի հետևանքով, ըստ ադրբեջանական կողմի, եղել է Ադրբեջանի կողմից զոհ… Ես չեմ բացառում, որ այդ զոհը եղել է իրենց միջանձնային հարաբերությունների պատճառով, որը փորձում են հիմա մատուցել որպես հայկական կողմից կրակոցի զոհ:Մենք հստակ ու հաստատակամ ենք, որ թույլ չենք տալու դիրքային փոփոխություն որևիցե հատվածում: Սա հստակ ուղերձ է, որը նաև իրենց այցով հղել են ՀՀ Պաշտպանության ու Արտաքին գործերի նախարարները», - ասաց Տիգրան Բալայանը: