Ղարաբաղյան առաջին զանգը՝ Փաշինյանի համար
ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին և Էնդրյու Շոֆերը, ինչպես նաև ԵԱՀԿ գործող նախագահի հատուկ ներկայացուցիչ Անջեյ Կասպրշիկը մայիսի 15-ին հանդիպել են Ադրբեջանի արտգործնախարար Էլմար Մամեդյարովի հետ: ԵԱՀԿ կայքում հաղորդագրության համաձայն՝ համանախագահները և Ադրբեջանի արտգործնախարարը քննարկել են հակամարտության խաղաղ կարգավորումն առաջ մղելու տարբերակները: Կասպրշիկը հաղորդել է, որ շփման գծում իրավիճակը համեմատաբար կայուն է: Ադրբեջանի արտգործնախարար Մամեդյարովն իր հերթին պատրաստակամություն է հայտնել որքան հնարավոր է շուտ սկսել ակտիվ բանակցությունները: Նշվում է, որ համանախագահներն ակնկալում են Հայաստանի նոր ղեկավարության հետ հանդիպել հունիսին: Պաշտոնական Բաքուն հայտարարում է, թե պատրաստ է ինտենսիվ բանակցություններ վարել ղարաբաղյան խնդիրը շուտափույթ կարգավորելու համար։ Այդ մասին, ըստ պաշտոնական հաղորդագրության, երեկ հայտնել է արտգործնախարար Էլմար Մամեդյարովը ԵԱՀԿ Մինսկի խմբի համանախագահներին՝ Փարիզում կայացած հանդիպումից հետո: «Հանդիպմանը ընդգծվեց ինտենսիվ բանակցությունները շարունակելու կարևորությունը՝ հաշվի առնելով այն, որ թե՛ Հայաստանում, թե՛ Ադրբեջանում ընտրական գործընթացներն արդեն ավարտվել են», - ասել է արտգործնախարարության խոսնակ Հիքմեթ Հաջիևը՝ հավելելով՝ նախարար Մամեդյարովը ևս մեկ անգամ ընդգծել է, որ Բաքուն պատրաստ է դրան: Ըստ ադրբեջանական կողմի, հանդիպմանը քննարկվել են նաև այն քայլերը, որոնք մտադիր են ձեռնարկել ԵԱՀԿ Մինսկի խմբի միջնորդները՝ կարգավորումն առաջ տանելու համար: Եվ ահա, Փաշինյանի վարչապետության պաշտոնից մեկ շաբաթ անց պաշտոնական Բաքուն ցույց է տալիս, թե շտապում է, անհրաժեշտ է համարում Նիկոլ Փաշինյանի հետ բանակցությունների անցկացումը: Հետաքրքրական է, որ համանախագահներն արդեն իսկ իրենց համատեղ հայտարարության մեջ ֆիքսել են, որ ակնկալում են Հայաստանի նոր ղեկավարության հետ հանդիպել հունիսին: Այսինքն, կոնկրետ ժամկետ կա: Կհասցնի՞ Նիկոլ Փաշինյանը մինչ այդ հանդիպումն անձամբ ծանոթանալ ղարաբաղյան կարգավորման ներկա փուլում բանակցությունների սեղանին առկա առաջարկներին, բոլոր նրբություններին, ընդհանուր իրավիճակին՝ կարգավորման գործընթացում ու տրամադրություններին, և, իհարկե, տարածաշրջանային իրադրությանը: Դատելով ԼՂ Պաշտպանության բանակի հրապարակած հաղորդագրություններից՝ Ադրբեջանը ակնհայտորեն ցույց է տալիս, որ հակված է լարման, ռազմական գործողությունների վերսկսման և, այդ իսկ պատճառով ռազմական տեխնիկայի կուտակումների էր գնում՝ Հայաստանում ներքաղաքական իրավիճակի լարմանը զուգահեռ: Փաշինյանը, փաստորեն, օրերս Պուտինի հետ հանդիպմանն առանձնապես չի ծանրացել ԼՂ խնդրի վրա, նա հասկացնել է տվել, որ հպանցիկ է այդ հարցը քննարկել Պուտինի հետ: Ղարաբաղյան առաջին բանակցությունները Փաշինյանի համար կլինեն առաջին զանգը: Դրանից հետո Բաքվի պահվածքից հնարավոր կլինի հասկանալ, թե որ ուղղությամբ է շարժվելու Ադրբեջանը՝ բանակցություննե՞ր, թե՞ շարունակական լարում: Թամար Բագրատունի
Հետևեք մեզ Viber-ում
