ՊԵԿ-ում պաշտոնավարումը լի էր հետաքրքիր աշխատանքով. Վարդան Հարությունյան

Պետական եկամուտների կոմիտեում պաշտոնավարումը լի էր հագեցած եւ հետաքրքիր աշխատանքով: Այս մասին ՊԵԿ աշխատակիցներին ուղղված իր հայտարարությունում նշել է կառույցի արդեն նախկին նախագահ Վարդան Հարությունյանը: Նա, մասնավորապես, նշել է. «Հարկային եւ մաքսային ծառայողների արհեստավարժ թիմի հետ համատեղ ու հետեւողական ջանքերի արդյունքում կոմիտեն շարունակական հաջողություններ է գրանցել վերջին մեկուկես տարում, ինչի համար շնորհակալություն եմ հայտում բոլորիդ: Պետական կառավարման կարեւոր օղակը՝ հարկային եւ մաքսային համակարգերը զարգացման նոր մակարդակի հասցնելու ծրագրերը, նորարարական բոլոր գաղափարները հնարավոր է դարձել կյանքի կոչել դրսեւորած կամքի, հետեւողականության, պատասխանատու եւ համախմբված աշխատանքի շնորհիվ: Համակարգը բարելավելու մեծ ձգտումը եւ արդյունավետ ծրագրերի իրագործումը տվել են իրենց արդյունքը. բիզնեսի հետ պետական կառույցի փոխհարաբերությունները տեղափոխվել են երկխոսության եւ գործընկերության դաշտ: Բոլոր նախաձեռնությունները կյանքի են կոչվել բիզնեսի համար առավելագույն հարմարավետություն ապահովելու տրամաբանությամբ: Հարկային եւ մաքսային ծառայողների կերպարը փոխելու հիմնաքարերն են դրվել՝ համակարգը վերլուծական կարողություններով, նոր մտածողությամբ օժտված աշխատակիցներով համալրելու բազմաթիվ ծրագրերի իրականացմամբ: Հարգելի գործընկերներ, շնորհակալություն եմ հայտնում բոլորիդ թիմային աշխատանքի, ցուցաբերած պատրաստակամության համար: Ինձ համար մեծ պատիվ էր ստանձնել ՊԵԿ ղեկավարի պատասխանատու պաշտոնը: Շնորհավորում եմ ՊԵԿ նորանշանակ նախագահ Դավիթ Անանյանին՝ անկախ հանրապետության առաջին տարիներից ձեւավորված առանցքային կառույցի ղեկը ստանձնելու առթիվ՝ մաղթելով արդյունավետ աշխատանք»: