«Դիմում եմ հայ ժողովրդին, որ օգնեն դատավոր Մակյանին». Պավլիկ Մանուկյան
Այսօր Շենգավիթի ընդհանուր իրավասության դատարանում ոստիկանության ՊՊԾ գնդի գրավման գործով դատական նիստում փաստաբան Արայիկ Պապիկյանը դատավոր Մեսրոպ Մակյանին ներկայացրեց միջնորդություն՝ բավարարել «Սասնա ծռեր» խմբի անդամ Վարուժան Ավետիսյանի դիմումը՝ «Արմավիր» ՔԿՀ-ում մամուլի ասուլիս կազմակերպելու մասին։ «Հաշվի առնելով, որ Հայաստանում տեղի են ունենում հասարակական-քաղաքական կյանքի արմատական փոփոխություններ, որոնք արդեն այսօր հանգեցրել են շոշափելի արդյունքի, առաջին հերթին՝ ժողովրդի կամքով ձևավորված կառավարության, իսկ շատերը ոչ առանց հիմքի լավատեսորեն հայտարարում են, որ արդեն մենք ապրում ենք նոր Հայաստանում, որոշեցի օգտվել խոսքի ազատության իմ իրավունքից և հրավիրել մամուլի ասուլիս։ Մամուլի ասուլիսը նախատեսում եմ իմ կալանքի վայրում՝ «Արմավիր» ՔԿՀ-ում, ասուլիսի թեման՝ «Սասնա Ծռերի ապստամբությունը և ապստամբական գործողությունների իրավաչափության հարցը»։ Ասուլիսի օրն ու ժամը կհայտնվի լրացուցիչ, քանի որ կա պատկան մարմինների հետ համաձայնեցնելու խնդիր», - նշել էր Վարուժան Ավետիսյանը իր դիմումի մեջ։ Ի պատասխան «Արմավիր» քրեակատարողական հիմնարկի պետը պատասխանել է, որ այդ մասին որոշումը պետք է կայացնի վարույթն իրականացնող մարմինը՝ այս դեպքում դատարանը։ «Դիմում եմ հայ ժողովրդին, որ այսօր օգնեն դատավոր Մակյանին՝ այսօր ծնվի արդարություն. այն է՝ փակել Արշակունյացին հարակից բոլոր փողոցները: Դիմում եմ Մոնթե Մելքոնյանի դպրոցի աշակերտներին. սիրելի՛ ժողովուրդ, ես իմ որդուն տվել եմ ձեզ, որ մի օր դուք ձեր որդիներին վստահեք մեզ»,- դիմելով դատավոր Մեսրոպ Մակյանին և քաղաքացիներին, ասաց «Սասնա ծռեր»-ի անդամ Պավլիկ Մանուկյանը: Նա հավելեց, որ «Սասնա ծռեր»-ը փախչելու տեղ և նման նպատակ չունեն:
Հետևեք մեզ Viber-ում
