Իրանը կընդլայնի ռազմական զորավարժությունների ծավալները

Իրանը մտադիր է ավելի լայնամասշտաբ զորավարժություններ անցկացնել, հայտարարել է Իրանի ցամաքային զորքերի հրամանատար Ահմադ Ռեզա Փուրդաստանը: Իրանի զինուժը մարտի 8-ին և 9-ին բալիստիկ հրթիռների փորձարկումներ էր իրականացրել՝ սեփական արտադրության հրթիռների փորձարկման եզրափակիչ փուլի ընթացքում: Ինչպես տեղեկացնում է РИА Новости գործակալությունը, այդ փորձարկումները բազմաթիվ պետությունների քննադատություններին էին արժանացել, մասնավորապես՝ այն քննադատել է ՄԱԿ-ում ԱՄՆ ներկայացուցիչ Սամանտա Փաուերը: ՄԱԿ-ի գլխավոր քարտուղարն Իրանին կոչ է արել «զգուշավոր գործել» և չնպաստել տարածաշրջանում լարվածության աճին: Իսրայելը համաշխարհային գերտերություններին կոչ է արել Իրանի դեմ միջոցառումներ ձեռնարկել բալիստիկ հրթիռների արձակման պատճառով: «Մենք ապագայում մեծ ուժերով զորավարժություններ ենք անցկացնելու բոլոր ուղղություններով՝ թե՛ ցամաքում, թե՛ օդում, թե՛ ծովում»,-ասել է Փուրդեստանը: Նա նաև նշել է, որ Իրանը չէր օգտագործի քիմիական կամ միջուկային զենք, եթե անգամ ունենար: