Բաղրամյան գյուղի դպրոցի տնօրենը հրաժարական տվեց (տեսանյութ)

Արմավիրի մարզի Բաղրամյան գյուղի միջնակարգ դպրոցի աշակերտներն ու նրանց ծնողները դպորցի բակում բողոքի ակցիա են անցկացրել՝ պահանջելով դպրոցի տնօրեն Շուշանիկ Ոսկանյանի հրաժարականը: Այս մասին հայտնում է NEWS.am-ը։ Ցույցին մասնակցող ծնողները պնդում էին, որ իրենցից պարբերաբար գումար են հավաքել տարբեր միջոցառումների, թատրոնների համար, անկախ նրանից երեխան գնացել է այդ միջոցառմանը, թե ոչ: «Մենք ուզում ենք ունենալ այնպիսի դպրոց, որ մեր երեխաներն ունենան լավ կրթություն, ունենանք դպրոց, որ տնօրենն իր կամքը չթելադրի: Բարերարները 20 համակարգիչ են նվիրաբերել դպրոցին, ինչու դրանք չեն ծառայում երեխաների համար»,-ասաց դպրոցի նախկին ուսուցիչներից մեկը: Քիչ անց շենքից դուրս է եկել դպրոցի տնօրենը եւ առաջարկել ծնողներից խումբ կազմվի եւ բարձրանա վերեւ՝ քննարկելու ցանկացած հարց, սակայն դրսում գտնվողները հրաժարվեցին: Այդուհանդերձ, ծնողների մի մասը մտավ դպրոցի շենք, որտեղ միջանցքում թեթեւ քաշքաշուկ տեղի ունեցավ ծնողների ու դպրոցի աշխատակիցների միջեւ: Աշակերտները պարբերաբար վանկարկել են. «Ոսկանյան, հեռացիր»: Ավելի ուշ գյուղապետ Գոռ Միրզոյանը հայտնեց, որ տնօրենն արդեն հրաժարական է տվել: Նա նշեց, որ բողոքի ակցիան արդեն ավարտվել է: