Փոխթաղապետի, պատգամավորի եւ գործարարի որդիների համատեղ բիզնեսը․ սրճարան՝ այգում.hetq.am
Մայրաքաղաքի Սարյան փողոցի, Մաշտոցի և Գլխավոր պողոտաների հատման մասում՝ բարեկարգվող այգում, կառուցվում է շինություն, որը, ըստ նախնական տեղեկությունների, հետագայում կարող է դառնալ «Տաշիր պիցցա»: Համենայնդեպս, արդեն հաստատ է, որ լինելու է սրճարան։
Կառուցվող շինության տեղում ժամանակին հայտնի «Մալիբու» սրճարանն էր։
Ինչպես հայտնի է, այգու բարեկարգումն իրականացնում է «Տաշիր» ընկերությունների խումբը, որի նախագահը ռուսաստանաբնակ գործարար Սամվել Կարապետյանն է: «Հետք»-ն ավելի վաղ գրել է, որ քաղաքապետարան-մասնավոր հատված համագործակցության շրջանակում բարեկարգվում է Գլխավոր պողոտայի այգին: Տարածքը՝ 2,5 հեկտար: Նախագծի համաձայն՝ միջոցառումներ կազմակերպելու համար այգում կկառուցվի ամֆիթատրոն, նոր լուծումներով կվերականգնվեն շատրվանները, շուրջ 2500 քմ-ով կավելացվեն կանաչ տարածքները: Սակայն հանրությունը բարեկարգման ողջ ընթացքում մտահոգված է թե´ ծառահատումներով, թե´ նոր շինությամբ, որ կառուցվում է այգու սկզբնամասում:
«Հետք»-ը Երեւանի քաղաքապետարանից ճշտել է, թե ինչ է կառուցվում այգում, եւ ովքեր են կառուցողները: Քաղաքապետարանի աշխատակազմի քաղաքաշինության և հողի վերահսկողության վարչությունից տեղեկացնում են, որ սա ոչ թե նոր կառույց է համարվում, այլ՝ նախկինում այդ հատվածում գործող սրճարանի վերակառուցում:
Վերակառուցումն իրականացնում են «Դեֆի» եւ «Նոր Երևան» ՍՊԸ-ները՝ Երևանի քաղաքապետարանի հետ 2016 թվականի մարտի 31-ին կնքած պայմանագրով: Նախագիծն անցել է համապատասխան փորձաքննություն եւ ստացել դրական եզրակացություն: Վերակառուցվող սրճարանը հիմնականում լինելու է փայտե կոնստրուկցիաներից, ունենալու է փակ և բացօթյա հատվածներ: «Նոր Երեւան» ՍՊԸ-ն, որը նույնպես Գլխավոր պողոտայի այգու սրճարանի շինթույլտվություն ունի, «Տաշիր» խմբի ընկերություններից է։ «Դեֆի» ընկերությունը գրանցված է Տաշիր քաղաքի Գետափնյա 59 հասցեում: Ընկերության տնօրենը Գոռ Բարոյանն է, որը Սամվել Կարապետյանի գործընկերներից է։ Ընկերության գործունեության հասցեն է` Տերյան 69 (քաղաք Երեւան)։ Այդ հասցեում նույնանուն բիզնես կենտրոն է գործում, ինչպես նաեւ` «Տաշիր պիցցա» եւ «Տաշիր» ընկերությունների խմբի գրասենյակ: Մինչեւ 2007 թվականն այս ընկերությունում մասնաբաժին է ունեցել ՀՀԿ-ական նախկին պատգամավոր Գրիգորի Մարգարյանը՝ «Բելաջիո» ռեստորանի սեփականատերը: Այսօր արդեն ընկերության բաժնեմասերի 51 տոկոսը պատկանում է «Տաշիր» ընկերությունների խմբի սեփականատեր Սամվել Կարապետյանի եղբոր, Ազգային ժողովի պատգամավոր Կարենի Կարապետյանի որդուն՝ Նարեկին:
Ընկերության բաժնեմասերի 30 տոկոսին տիրապետում է Կենտրոն վարչական շրջանի ղեկավարի տեղակալ Հրանտ Բեգլարյանը: Նա տրանսպորտի եւ կապի նախկին նախարար, նախկին քաղաքապետ, ՀՀԿ-ական Գագիկ Բեգլարյանի որդին է: Կարապետյանների եւ Բեգլարյանների միջեւ խնամիական կապ կա: Հրանտ Բեգլարյանի հարսանիքի քավորը Սամվել Կարապետյանն է:
Գագիկ Բեգլարյանի փոխթաղապետ որդու անունը մոտ 10 ընկերությունների հետ է առնչվում։
«Դեֆի» ընկերության բաժնեմասերի 19 տոկոսը պատկանում է Արտավազդ Պետրոսյանին: Նա գործարար Նորիկ Պետրոսյանի որդին է, գրանցված է Կոտայքի մարզի Ակունք գյուղում, որը նրա ծննդավայրն է:
Նորիկ Պետրոսյանը համարվում է գյուղի գործարարներից, Ակունքում հոգեւոր կենտրոն է կառուցել, խաչքարների տեղադրում հովանավորել: Նա «Նեվտեգազստրոյ» ընկերության բաժնետերերի 50 տոկոսի սեփականատերն է: Այս ընկերությունը Գազպրոմի հետ խոշոր պայմանագրեր կնքած ընկերություն է:
Նորիկ Պետրոսյանն ապրիլյան ռազմական գործողություններից հետո 100 հազար դոլար էր փոխանցել Արցախի կառավարության հատուկ հաշվեհամարին: Իսկ դրանից մեկ տարի առաջ՝ 2015 թվականին, Հայոց ցեղասպանության 100-րդ տարելիցի կապակցությամբ Երախտագիտության մեդալով էր պարգեւատրվել Սերժ Սարգսյանի կողմից:
Նորիկ Պետրոսյանի որդին կապ ունի նաեւ «Նոր Երեւան» ընկերության հետ։
Նյութի աղբյուրը՝ hetq.am
Հետևեք մեզ Viber-ում
