Խայտառակություն է. Ազատ Արշակյանը մանրամասնեց
«Ընտրական օրենսգրքի ներկայացված տարբերակը հակաժողովրդավարական է: Նույնիսկ գործող ընտրական օրենսգիրքն ավելի ժողովրդավարական էր, քան այս առաջարկվող տարբերակը»,-Հայելի.am-ի թղթակցի հետ զրուցում անդրադառնալով ընտրական օրենսգրքի նոր նախագծին ասաց ԳԽ նախկին պատգամավոր, ընդդիմադիր քաղաքական գործիչ Ազատ Արշակյանը: Ազատ Արշակյանն ընդգծում է, որ նախորդ ընտրական օրենսգրքում տեղ էին գտել բազմաթիվ թերություններ,սակայն այս օրենգրքում շեղումներն ավելի ցայտուն են.«Մեծամասնականով անցնում էին օլիգարխիան, քրեական հեղինակությունները, որը ավելի լավ էր և ապաքաղաքականացնում էր մեծամասնական երևույթը: Այն ժամանակ 40 տոկոսն էր մեծամասնականով անցնում, բայց հիմա տոկոսը բարձրացել է: Հայտարարվում է, որ համամասնական կարգով է անցնելու ամբողջ ընտրությունը, այսինքն` Հայաստանի հանրապետությունով մեկ ընտրական տարածք է հայտարարվում և բազմաթիվ ցուցակներ են ի հայտ գալիս: Մեր հանրապետության ունեցած փորձը ցույց է տալիս, որ չենք կարող հսկել մեծամասնական ընտրակարգը»: Քաղաքական գործիչը նկատում է, որ պետք է փոփոխություններ կատարվեին կուսակցությունների մասին օրենքում`կուսակցությունների խոշորացման նպատակով.«Այսինքն պետք է կուսակցությունները ապահովեին իրենց մասնաճյուղերի ներկայությունը ընտրական տեղամասերում,պետք է դա գրանցի Արդարադատության նախարարությունը կամ մեկ այլ պետական մարմին: Այս օրենքը կա, բայց իրավունք չկա պարզելու` քանի՞ մարդ կա տվյալ կուսակցությունում: Սա պետք է արվի, որ մարդ-կուսակցությունները միավորվեն և դառնան մեկ կուսակցություն: Նաև պետք է լինի կուսակցությունների ֆինանսատնտեսական գրանցում: Այսինքն` գրանցվեն բոլոր անդամավճարները և դա ֆիքսվի հարկային դաշտում: Այստեղից կերևա կուսակցությունները չգրանցված միջոցներին են տնօրինում, թե` ոչ: Նման կուսակցությունները պետք է զրկվեն ընտրություններին մասնակցելու հնարավորությունից: Այս հանգամանքը կարևոր է նրանով, որպիսի մեծահարուստ անհատները չկարողանան ունենալ իրենց կուսակցությունը և դրանով ընտրութան մասնակցեն»,-ասում է Ազատ Արշակյանը: Արշակյանի խոսքով` ընտրությունների մասին օրենքում պետք է ամրագրվի, որ եթե ընտրակեղծիք է արվել կոնկրետ կուսակցության օգտին, ապա այդ կուսակցությունը պետք է զրկվի ընտրություններին մասնակցելու իրավունքից: «Այս պայմաններում իշխանություն-ընդդիմություն իրավունքները հավասարվում են և հեշտանում է դիտորդների գործը»,-ընդգծում է Ազատ Արշակյանը: Արշակյանը առաջարկում է ընտարխախտումներ իրականացնող անձանց պատժել քրեական հանցագործությանը համարժեք հոդվածով, քանի որ սա ժողովրդավարության դեմ իրականացվող հանցագործություն է: «Ընտրվելուց հետո, եթե որևէ խմբակցություն կայուն մեծամասնություն չի ունենում, ապա առաջին երկու տեղերը գրաված կուսակցությունները մեխանիկորեն դաշինք են կազմում և ձևավորում են կառավարություն: Ստացվում է, որ փոքրամասնությունը ձևավորում է կառավարություն, իսկ մյուս կուսակցությունները զրկվում են: Դրանում է խայտառակությունը»,-եզրափակեց Ազատ Արշակյանը: Լ.Ղազարյան
Հետևեք մեզ Viber-ում
