Այս կառավարության հետ աշխատել ցանկացող ՀՀԿ-ականների անդամակցությունը կուսակցությանը կսառեցվի. Մարգարիտ Եսայան
Ինչպես Hayeli.am-ը տեղեկացրել էր՝ ՀՀԿ-ն այսօր ՀՀԿ գրասենյակում խորհրդի նիստ էր հրավիրել: Այսպիսով նիստի ժամանակ քննարկվել են ներկուսակցական, աշխատանքային հարցեր: ԱԺ պատգամավոր, ՀՀԿ անդամ Մարգարիտ Եսայանը նիստից հետո տեղեկացրեց, որ իրենք չեն խոչընդոտելու Նիկոլ Փաշինյանի գործունեությանը: «Ասվեց այն, ինչ մենք ասում ենք՝ մենք չեն խոչընդոտելու, այլ հակառակը՝ օժանդակելու ենք այս կառավարության գործունեությանը, որովհետև այս կառավարության հաջողությունը լինելու է մեր ամբողջ ժողովրդի հաջողությունը և պարտությունը լինելու է բոլորիս պարտությունը։ Մեր ամբողջ ջանքերը ներդնելու ենք, որ այս կառավարությունը հաջողի», - ասաց Մարգարիտ Եսայանը։ Պատգամավորը լրագրողների հարցերին ի պատասխան նշեց, որ ՀՀԿ միասնական է: «Բոլոր այն կուսակցականները, ովքեր կցանկանան աշխատել այս կառավարությունում, կարող են աշխատել, կուսակցությունը չի խոչընդոտելու։ Ուղղակի խնդիր դրվեց, որ այդ ընթացքում կսառեցվի կուսակցությանն իրենց անդամակցությունը, որովհետև որքան էլ մենք աջակցելու ենք, բայց չենք կիսելու այդ կառավարության պատասխանատվությունը», - ասաց Մարգարիտ Եսայանը։
Հետևեք մեզ Viber-ում
