Խնդրում եմ Ձեր ուշադրությունը. ՍԲ Հովհաննես եկեղեցու հարևանությամբ բնակվող անձիք ահազանգում են

Բաց նամակ Հարգելի hayeli.am գրեթե ամեն օր Ձեր կայքի միջոցով եմ հետևում Հայաստանում ծավալվող իրադարձություններին: Մի խնդրի մասին եմ ուզում բարձրաձայնել և որոշեցի դա անել Ձեր կայքի միջոցով: Ես ապրում եմ ՍԲ Հովհաննես եկեղեցու հարևանությամբ: 2013թ-ի հունվարին ՀՀ կառավարությունը Կոնդի ՍԲ Հովհաննես եկեղեցու հարակից տարածքը՝ 1005 քառակուսի մետր մակերեսով, 400 միլիոն դրամ արժեք ունեցող հողամասը նվիրաբերել է Երեվան իմ սեր հիմնադրամին՝ իբր ինչ-որ հին պատմական շենք պետք է այդ տարածքում վերակառուցեն: Անցել է ավելի քան 5 տարի ու այդ տարածքն այդպես ամայի մնացել է: Չնայած տարածքը ցանկապատված է, բայց այդուամենայնիվ, հատկապես երեկոյան ժամերին այդ տարածքի մոտով անցնել ուղղակի հնարավոր չէ, վախենալու է: Այնտեղ թափառող շներ են, հարբեցողներ ու նաև մարմնավաճառներ: Ոչ միայն հարբեցողների և մարմնավաճառների ու նրանց հաճախորդների հայհոյանքներն ենք լսում ու նրանց միջև տեղի ունեցող վեճերը, այլև բազմաթիվ այլ ձայներ: Այսինքն նրանք բոլորն էլ կարողանում են անցնել ցանկապատից այն կողմ: Դիմել ենք Երևանի քաղաքապետարան, սակայն մեզ ասեցին, որ տարածքը անվարձահատույց կերպով նվիրաբերված է Երևան, իմ սեր հիմնադրամին, ուստի հիմնադրամն է պատասխանատու՝ երբ կկառուցվի նախատեսված շինությունը և հորդորեցին դիմել հիմնադրամին: Հիմնադրամի տնօրեն Արշակ Կարապետյանի հետ կապ հաստատել ուղղակի հնարավոր չէ: Երկու կայքի ենք դիմել ես և հարևաններս, բայց լրագրողներն ասում են, որ երբ Արշակ Կարապետյանը լսում է, որ զանգահարողը լրագրող է կամ անջատում է հեռախոսը, կամ ասում՝ հիմա հարմար չէ, զանգեք մի փոքր ուշ: Երբ հետո նորից զանգում են՝ էլ չի պատասխանում զանգերին: Չգիտենք հիմնադրամն առհասարակ նորմալ աշխատակազմ ունի, թե չէ: Խնդրում ենք բարձրաձայնել Ձեզ այս խնդրի մասին, գոնե Ձեր միջոցով հասանելի լինի մեր Ձայնը և խնդիրը լուծվի: Շնորհակալ եմ: Արեն Մալյան