Արմեն Սարգսյանը հաղթահարել է վախերը

Լինում է, չի լինում մի թագավոր է լինում, անունը՝ Արմեն Սարգսյան: Էս թագավորին, որին իսկզբանե գործատուն Հայաստան էր բերել Անգլիայից, որպեսզի իր մոտ նախագահ աշխատի, կամ ինչպես թագավորի ազնվական ականջին է հարիր՝ անգլիական թագուհի, և թագուհու համար նախապես հարմարեցվել էր միջավայրը, զրկել նրան գործուն լծակներից ու ղեկավարման լիազորություններից, հագուրդ տալով թագուհու բացառապես սնափառ կրքերին՝ Սահմանադրության մեջ նախօրոք ամրագրել էր, որ այդ ոչ մի բան չանող, ոչինչ չունեցող, դերակատարումից զրկված թագուհին է պետության գլուխը, բերել էր նրան հեռավոր Անգլիայից, որպեսզի թագավորն ապրած կենան իր հոլիվուդյան ժպիտը ցուցադրելու բազում առիթներ ունենա, հյուրեր ընդունի-ճանապարհի, ֆիզիկական ներկայություն ապահովի այս կամ այն միջոցառմանը՝ ներշնչելով, թե ինքը Սահմանադրության երաշխավորն է, այն Սահմանադրության, որն իրեն զրկել է նույնիսկ պարգեւատրումներ ու մեդալներ շնորհելուց: Եւ թագավորն այդ համաձայնել էր ցանկացած կարգավիճակով նախագահ աշխատել գործատուի ձեռքի տալ, որովհետեւ վաստակաշատ դեսպանի, բիզնեսմենի ու անփառունակ վախճանով Հայաստանից հեռացած վարչապետի համար սա մանկության երազանք էր եղել՝ կենսագրության մեջ ոսկե տառերով ՀՀ Նախագահ կարգավիճակն ամրագրելը: Թագավորն այդ չէր էլ կարող երազել, որ օրերից մի օր ինքը կազատվի գործատուի կապանքներից ու կսլանա փառքի ճանապարհով: Կունենա հնարավորություն ապացուցելու իր լեգիտիմությունը, առայժմ միայն ժողովրդի թեկնածու Նիկոլ Փաշինյանի առջեւ, ով վստեհեցնում է, որ իր հետ հանդիպմանը Արմեն Սարգսյանը ներկայացրել է ՀՀ քաղաքացիության վերաբերյալ համապատասխան փաստաթղթերը, ինչը ցուցադրելու հնարավորությունից Սերժ Սարգսյանի իշխանության ժամանակ կարծես թե զրկված էր Արմեն Սարգսյանը: Այլապես նա վերջ կդներ բոլոր կասկածներն ու կկանգնեցներ այդ առթիվ բարձրացրած անխնա քննադատությունների ալիքը : Այն պահից, երբ Փաշինյանը թավշյա հեղափոխության միջոցով իր ձեռքը վերցրեց Հայաստանում քաղաքական իրադրությունը, Արմեն Սարգսյանը որոշեց հետ չմնալ նրանից, նա կրնկակոխ հետեւեց Փաշինյանին՝ քաղաքական երկնակամարում ողացնելով իր աստղը: Մոռացության գիրկը նետված Սարգսյանը նախ կցկտուր կոչեր արեց, իսկ երբ իշխանությունը դիմեց նրա օգնությանը ու միջնորդական առաքելությամբ գործուղեց հրապարակ, հազարավոր քաղաքացիների շարքեր մտած պալատական պաշտոնյան մոտիկից զգաց հրապարակի ուժը, հաղթահարեց բոլոր վախերը ու նա էլ որոշեց իրավիճակից օգուտը քաղել: Այն, ինչ անում է վերջին շաբաթներին Արմեն Սարգսյանը, պարզապես ապշեցնող է: Ով կմտածեր, որ Սերժ Սարգսյանի հպատակը վերջինիս գահընկեցությունից հաշված օրեր հետո պիտի պոռթկար, որ Հայաստանում կատարվող իրադարձություններն ուղղակի ապշեցնող են, որ երկու ամիս առաջվա Հայաստանն ու հիմիկվանը բոլորովին նույնը չեն, որ վերջապես կոչ աներ պատգամավորներին ընտրել մի մարդու, ով Սերժ Սարգսյանին հեռացրեց իր պաշտոնից: <<Վստահ եմ, որ հանրօգուտ լուծման շնորհիվ Հայաստանում կստեղծվի հանրային վստահության մթնոլորտ, եւ մեր քաղաքացիները, համայն հայության հետ միասին, կլծվեն Մայր Հայրենիքի վերաշինման գործին: Ուրեմն ի գործ՝ հանուն Նոր Հայաստանի»: Սա էլ դեռ կինոյի ավարտը չէ, Սարգսյանը «Էխո Մոսկվի»-ի հետ հարցազրույցում նշել է , որ ինքը կաշխատի Փաշինյանի հետ.«Դե եթե ես կարողացել եմ աշխատել նրա հետ հրապարակում․․․Երեւի կկարողանամ, ոչ միայն կկարողանամ, բայց եւ կաշխատեմ նրա հետ։ Նա երիտասարդ, իսկապես տաղանդավոր մարդ է։ Բայց դա մի որակ է։ Ինչպիսի վարչապետ նա կլինի՝ ժամանակը ցույց կտա։ Իմ դերը կլինի, հաշվի առնելով իմ կյանքի փորձը եւ իմ սկզբունքները կյանքում, եթե նա ցանկանա, նրան խորհուրդներ տալը, որը ինձ համար առաջնային է, ինչպես միշտ է եղել, դա օրենք է, օրինականություն եւ կառույց։ Այսինքն, եթե ինչ-որ մեկը անցնի կառույցը կամ օրենքը, կտեսնի իմ պատը»,-ասել է Սարգսյանը։ Մեզ մնում է արձանագրել, որ Արմեն Սարգսյանը ոչ ավել, ոչ պակաս մարտահրավեր է նետել Փաշինյանին, թե ով է այս ճանապարհին ավելի շատ մեծացնել իր փառքը, կդիտարկենք մոտ ապագայում: Անի Սահակյան