Ծառուկյանի առաջին կսմիթը Փաշինյանին

Նիկոլ Փաշինյան-Գագիկ Ծառուկյան համագործակցությունը դեռ միս ու արյուն չի ստացել, դեռ չի ձեւավորվել ապագա կառավարությունը, որը Փաշինյանը խոստացել է դարձնել ազգային համաձայնության , սա էլ ենթադրում է պորտֆելներ Ծառուկյան դաշինքի ու ՀՅԴ-ի ներկայացուցիչներին, բայց արդեն առաջին խլրտոցներն են նկատվում։ Այսօր խորհրդարանում Գագիկ Ծառուկյանը՝ պատասխանելով 15 միլիարդ դոլարի ներդրման խոստումի մասին հարցին՝ պատրաստվում է Փաշինյանի ղեկավարած կառավարության գործունեության ընթացքում իրականություն դարձնել ներդրումների մասին խոստումը։ Հիշեցնենք, որ 2017 թվականին նախընտրական շրջանում 15 միլիարդ դոլար ներդրումների խոստման մասին հայտարարեց Ծառուկյանը, ասելով, որ այդ ժամանակահատվածում իր գործընկերները ԱՄԷ-ից, եվրոպական երկրներից զանգահարել էին ու ասել, որ վստահում են իրեն և պատրաստ են 50 միլիար դոլար ներդրում անել:Ծառուկյանը պատասխանեց, որ ներդրումներ կլինեն, բայց դրանց չափը կախված է նրա կառավարության ներկայացրած ծրագրից: Ինչ վերաբերում է 15 եւ ավելի միլիարդ դոլարի ներդրումներին, ապա Ծառուկյանը հիշեցրեց իր հայտարարությունը հիմա էլ ուժի մեջ է, բայց եթե ինքը 50+1 հավաքի խորհրդարանում եւ իշխանություն ստանձնի։ Բայց մենք հիշում էինք, որ բառացիորեն մի քանի օր առաջ Ծառուկյանի շրջապատից տեղեկություններ էին տարածվում, որ նա պատրաստ է այդ ներդրումները կատարել։ Բայց ամեն ինչ այսքանով չավարտվեց։ Պատասխանելով Նիկոլ Փաշինյանի այն հայտարարությանը, որ իր ղեկավարած կառավարությունում օլիգարխներ չեն լինելու ու ինքն ամեն ինչ անելու է բիզնեսը քաղաքականությունից տարանջատելու համար, Ծառուկյանը մի քանի անգամ պնդեց, որ չի պատրաստվում հեռանալ քաղաքականությունից․ «Ծառուկյանը երբեք ու երբեք քաղաքականությունը չի ծառայեցրել, չի համարել իր համար բիզնես, և քաղաքականությունով չի զբաղվում, որ կարողանա իր բիզնեսը ավելի զարգանա, բարգավաճի: Ծառուկյանը միշտ էլ, հակառակը, պիտանի է եղել հնարավորություն ու պայման ստեղծելու, որ կարողանանք մեր նպատակներին հասնել»։ Նա ընդունում է Նիկոլ Փաշինյանի հայտարարությունը ու ասում, այն քաղաքական գործիչները, որոնք քաղաքականությունը համարում են իրենց համար բիզնես և ծառայեցնում են իրենց բիզնեսի զարգացման, մենաշնորհ ձեռք բերելու համար, չպետք է լինեն քաղաքականության մեջ: Հիշեցմանը, որ Հայաստանի Սահմանադրությունն է արգելում, որպեսզի պատգամավորը զբաղվի գործարարությամբ, Ծառուկյանը պատասխանեց. «Ամերիկայի պես երկիրը, որը համար առաջինն է աշխարհում, այսօր ո՞վ է իրենց նախագահը: Կարող ա Սահմանադրություն գրողը սկի չի հասկացել ինչ ա գրել: Բայց ես այսօր ասում եմ՝ Թրամփը ԱՄՆ նախագահն է եւ Օբամայից ավելի էֆեկտիվ ու արդյունավետ է այս ճգնաժամի ժամանակ»: Հարցին՝ արդյոք Ծառուկյանն էլ նման նպատակ ունի, որ Թրամփի օրինակն է բերում, վերջինս պատասխանեց․ «Ես ասում եմ՝ Ծառուկյանն այդպիսի նպատակ չունի, չի ունեցել: Եթե Ծառուկյանն այդպիսի նպատակ ունենար, ես անցյալ անգամ էլ ձեզ ասացի՝ աշխարհաքաղաքական տարբեր կենտրոններից քաղաքական գործիչներով, արվեստով, մշակույթով, կրթությունով, փոքր ու միջին բիզնեսով, գործարարներով առաջարկել են Ծառուկյանին թեկնածու դնելը: Բայց Ծառուկյանն ասել ա՝ ես չեմ ցանկանում եւ հիմնականը հարգում եմ իմ ժողովրդին եւ ժողովրդի որոշումը: Եթե Ծառուկյանը ցանկանար, կարող էր, եթե առաջին անգամ Նիկոլ Փաշինյանը չընտրվեց, մենք մեր թեկնածությունը դնեինք: Բայց ես հարգում եմ իմ ժողովրդին, այդպիսի ցանկություն չունեմ, չեմ էլ ուզում այդպիսի ծանրության տակ մտնել»: Ծառուկյանը եզրափակեց՝ եթե լինեն արտահերթ ընտրություններ, ապա «Բարգավաճ Հայաստանը» մասնակցելու է, Ծառուկյանն էլ իր թեկնածությունը կդնի. «Մենք քաղաքական ուժ ենք, որը քսան տարի լիարժեք արել ենք, անում ենք, անելու ենք»: Ինչպես ասում են՝ կենացները նոր-նոր են քաղցրանում եւ Ծառուկյանը իր թիմին լրջորեն պատրաստում է արտահերթ ընտրությունների, չի շտապում ընկրկել Փաշինյանի հայտարարություններից, առավել եւս վախենալ ու հայտարարել ներդրումների մասին։ Ճիշտ հակառակը, նա ասում է, որ կտեսնեք այդ միլիարդները, երբ Ծառուկյանին ցանկանաք տեսնել իշխանություն։ Այնպես որ, առաջիկա ամիսներին ոչ այնքան այս ուժերի մեջ համագործակցություն ենք տեսնելու, որքան մրցակցություն։ Անի Սահակյան