Առեղծվածային դեպք Արարատի մարզում

SHAMSHYAN.com-ի տեղեկություններով՝ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնի ավագ քննիչ Օսիպյանի կողմից նյութեր են նախապատրաստվում երեկ՝ մայիսի 7-ին, Արարատի մարզում տեղի ունեցած 31-ամյա կնոջ մահվան փաստով: Ինչպես հայտնում է ֆոտոլրագրող Գագիկ Շամշյանը, ժամը 16:00-ի սահմաններում հիվանդանոցից ոստիկանության Մասիսի բաժին տեղեկացրել են, որ «կլինիկական մահ, կրծքավանդակի առաջային պատի սրտի պրոյեկցիայի կտրած ծակած, արյունահոսող վերք, կենսաբանական մահ» ախտորոշմամբ իրենց մոտ է տեղափոխվել Արարատի մարզի բնակիչ Անուշ Թ-ն: Հիվանդանոց են մեկնել ոստիկանության Արարատի մարզային վարչության օպերատիվ խումբը՝ մարզի ոստիկանապետ Սևան Քոչարյանի և ոստիկանության Մասիսի բաժնի օպերատիվ խումբը՝ բաժնի պետ Վարդան Վարդանյանի գլխավորությամբ: Ժամանել է նաև քննչական խումբը: Ոստիկաններն ու քննիչները պարզել են, որ Անուշ Թ.-ն հիվանդանոց է տեղափոխվել իրենց տան խոհանոցից, որտեղ դանակով հարված է ստացել կրծքավանդակին: Տեղի ունեցածը ինքնասպանություն է, թե սպանություն՝ պարզ կլինի մի շարք փորձաքննությունների արդյունքներ պարզ լինելուց հետո: Գ. Շամշյանի տեղեկություններով՝ հիմնական վարկածը, այնուամենայնիվ, ինքնասպանությունն է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: