Այս գործընթացը պետք է շարունակվի հայ ժողովրդի ցանկությամբ. ԵԽ գլխավոր քարտուղարի ուղերձը
Եվրոպայի խորհրդի գլխավոր քարտուղար Թորբյորն Յագլանդը ուղերձ է հղել ՀՀ վարչապետ Նիկոլ Փաշինյանին ՀՀ վարչապետի պաշտոնում ընտրվելու կապակցությամբ: «Եվրոպայի խորհրդի անունից շնորհավորում եմ Նիկոլ Փաշինյանին Հայաստանի վարչապետի պաշտոնում ընտրվելու առթիվ: ՀՀ խորհրդարանի՝ այսօր կայացրած որոշումը ցույց է տալիս, որ սահմանադրական բարեփոխումը, որն իրականացվում է մեր կազմակերպության օգնությամբ, սկսել է իրականություն դառնալ: Այս գործընթացը պետք է շարունակվի հայ ժողովրդի ցանկությամբ: Եվրոպայի խորհուրդը պատրաստ է հետագայում եւս ապահովել ցանկացած աջակցություն Հայաստանի իշխանություններին այդ շատ կարեւոր գործընթացում, որի հիմքում ընկած են մարդու իրավունքները, ժողովրդավարությունն ու օրենքի գերակայությունը»,- ասված է Յագլանդի ուղերձի մեջ: Ավելի վաղ ԵՄ դիվանագիտության ղեկավար Ֆեդերիկա Մոգերինին եւ Եվրոպական հարեւանության քաղաքականության եւ ընդլայնման բանակցությունների հարցերով ԵՄ հանձնակատար Յոհաննես Հանը համատեղ հայտարարությամբ են հանդես եկել՝ նշելով, որ ԵՄ-ը համագործակցություն է ակնկալում ՀՀ նորընտիր վարչապետ Նիկոլ Փաշինյանի հետ՝ ՀՀ-ի հետ համապարփակ եւ ընդլայնված գործընկերության մասին համաձայնագրի իրականացման շրջանակում:
Հետևեք մեզ Viber-ում
