Ինչպես Կուտուզովը՝ Բորոդինոյի ճակատամարտից հետո նահանջեց ու հետո հրդեհեց Մոսկվան, այնպես էլ ՀՀԿ-ն հանձնեց Բաղրամյան 26-ի իր ամրոցը Նիկոլին.Հմ.Հովհաննիսյան

Ինչպես Կուտուզովը՝ Բորոդինոյի ճակատամարտից հետո նահանջեց ու հետո հրդեհեց Մոսկվան, այնպես էլ ՀՀԿ-ն հանձնեց Բաղրամյան 26-ի իր ամրոցը Նիկոլին և նույնպես նախապատրաստվում է պարտիզանական գործողությունների իրականացմանը: Ինչպես Սմոլենսկի ճանապարհով նահանջը դարձավ Նապոլեոնի համար ճակատագրական, այնպես էլ Արցախի հարցում միջազգային միջնորդների կողմից մեզանից պահանջվող ՙՙփոխզիջումները՚՚ կարող են Նիկոլի համար դառնալ ճակատագրական: Այն, որ Վլադիմիր Պուտինն առաջինը շնորհավորեց Նիկոլ Փաշինյանին ցույց է տալիս, որ ՙՙռուսաց թագավորը՚՚ ձգտում է իր համար ՙՙամուր ալիբի՚՚ ստեղծել առ այն, որ ինքը ոչ մի կապ չունի Արցախում պատերազմական գործողությունների հավանական վերսկսման հետ, քանզի ամենաշատն էր ուրախացել Նիկոլի, այլ ոչ թե Կարեն Կարապետյանի վարչապետ ընտրվելու կապակցությամբ: Այս բարդ իրավիճակում նորընտիր վարչապետի համար չափազանց կարևոր է ամրապնդել ազգային անվտանգության համակարգը՝ փոխելով դրա դեղնակտուց ու ոչ պրոֆեսիոնալ ներկայիս ղեկավարին: Եթե հաշվի առնել այն, որ մեր երկրի անվտանգության համար առաջին երաշխավորը տեսանելի ժամանակաընթացքում շարունակելու է մնալ Ռուսաստանը, ապա ԱԱԾ-ի պետի պաշտոնում պետք է նշանակվի այնպիսի անձնավորություն, որը իր կապերով, հեղինակությամբ և մասնագիտական բարձր որակներով կկարողանա կանխել հայկական հեղափոխության և նրա առաջնորդի նկատմամբ ռուսաստանյան ուժային կառույցների որոշակի շրջանակների բացասական վերաբերմունքի հետևանքները: Սա շատ կարևոր խնդիր է և իմ կարծիքով այդ պաշտոնի համար այսօրվա հնարավոր թեկնածուներից այդպիսի հատկանիշներով ամենաշատն օժտված է գեներալ-լեյտենանտ Կառլոս Պետրոսյանը, ով շարժման առաջին օրվանից ջերմեռանդորեն ձգտում է օգտակար լինել հայկական թավշյա հեղափոխությանը: Հմայակ Հովհաննիսյանի գրառումը