Փաշինյանի առաջին ելույթը վարչապետ ընտրվելուց հետո
Քիչ առաջ ՀՀ նորընտիր վարչապետ Նիկոլ Փաշինյանն այցելեց Հանրապետության հրապարակ: Այստեղ հավաքված քաղաքացիներն, իրար հերթ չտալով, լուսանկարվում էին Փաշինյանի հետ: Մինչ հարթակից Նիկոլ Փաշինյանի ելույթը հնչեց ՀՀ օրհներգը: «Այսօր եւ սրանից հետո միայն մի սուբյեկտ իրավունք ունի որոշելու՝ ով կլինի իշխանության մեջ, եւ այդ 1 սուբյեկտը ՀՀ քաղաքացին է: Պետական պաշտոնը՝ նախագահ, վարչապետ, դրանք ընդամենը ծառայություն են ժողովրդին ու այսուհետ ՀՀ ժողովուրդը պետք է հոգ տանի, որ այդ պաշտոնյան ծառայի անմնացորդ, ես ծառայում եմ հայրենիքիս ու Հայաստանի Հանրապետության ժողովրդին, ծառայում եմ Արցախի Հանրապետությանը»,- ասաց Նիկոլ Փաշինյանը։ Այնուհետև շարունակելով խոսքը՝ հայտարարեց. «Այլևս երբեք որևէ մեկը չի համարձակվի որևէ ոտնձգությամբ խլել ձեր այդ հաղթանակը: Ուզում եմ հստակ արձանագրենք՝ որն է ձեր հաղթանակն ու դրա էությունը: Հաղթանակն այն չէ, որ ես ընտրվել եմ ՀՀ վարչապետ, հաղթանակն այն է, որ դուք եք որոշել, թե ով լինի ՀՀ վարչապետ: Կապ չունի, թե ով կլինի ՀՀ վարչապետ: Ստանձնելով ՀՀ վարչապետի պաշտոնը՝ հայտարարում եմ, որ ծառայում եմ հայ ժողովրդին, ծառայում եմ Հայաստանի Հանրապետության քաղաքացիներին, ծառայում եմ Արցախի Հանրապետությանը, ծառայում եմ Հայաստանի Հանրապետությանը: Եվ ուրեմն, կեցցե ազատությունը, կեցցե Հայաստանի Հանրապետությունը, կեցցենք մենք ու մեր երեխաները, որ արդեն ապրում ենք հենց հիմա ազատ և երջանիկ Հայաստանում»:
Հետևեք մեզ Viber-ում
