Ֆիզիկապես ուշացա այս գեղեցիկ հեղափոխությունից.Սերժ Թանկյան
Արդեն տեղեկացրել ենք,որ Հայաստան ժամանեց աշխարհահռչակ ռոք երաժիշտ Սերժ Թանկյանը: Օդանավակայանում նրան դիմավորեց «Իմ քայլը» շարժման առաջնորդ, ԱԺ «Ելք» խմբակցության ղեկավար Նիկոլ Փաշինյանը: Փաշինյանի հրավերով էլ երաժշտին դիմավորելու համար օդանավակայանի շրջակայքում հավաքվել էին բազմաթիվ քաղաքացիներ: Օդանավակայանից Սերժ Թանկյանը Նիկոլ Փաշինյանի ուղեկցությամբ Հանրապետության հրապարակ հասավ պլանավորվածից մոտ մեկ ժամ ուշ:Քանի որ օդանավակայանից քաղաքի կենտրոն տանող ճանապարհը մարդիկ փակել էին,նրանք ստիպված եղան ճանապարհի կեսը ոտքով անցնել: «Ֆիզիկապես ուշացա այս գեղեցիկ հեղափոխությունից, բայց հավատացե՛ք, որ հոգով միշտ ձեզ հետ էի. ոչ միայն ես, այլև ամբողջ սփյուռքահայությունը»,- Հանրապետության հրապարակում իր ելույթը այսպես սկսեց աշխարհահռչակ ռոք-երգիչը: «Շնորհակալություն եմ հայտնում հայ ժողովրդին, որը խաղաղ ցույցերով կարողացավ ստեղծել հայ ազգի բաղձալի հայրենիքը: Հիմա արդեն ամբողջ աշխարհը ձեզ է նայում՝ իբրև դրական օրինակի. երգով, պարով ու ժպիտով հասաք ձեր նպատակին:Աշխարհը տարիներ շարունակ հայերին ճանաչել է Ցեղասպանությամբ, երկրաշարժով ու պատերազմով, բայց այժմ այս շարժմամբ հայերը բարձրացրին մեր երկրի վարկանիշը»,- ասաց նա :
Հետևեք մեզ Viber-ում
