Հեղափոխության բոլոր կանոններով ՀՀ վարչապետը պետք լինի նա, ով նախաձեռնել է հեղափոխությունը.Մարուքյան

«Վաղը Նիկոլ Փաշինանը ՀՀ վարչապետ կընտրվի։ Սրանով Հայաստանում նոր սկիզբ կդրվի փոփոխությունների», -  լրագրողների հետ ճեպազրույցում ասաց «Ելք» խմբակցության պատգամավոր Էդմոն Մարուքյանը։ «Հեղափոխության բոլոր կանոններով ՀՀ վարչապետը պետք լինի նա, ով նախաձեռնել է հեղափոխությունը։Այստեղ տարաձայնություն չկա, ով նախաձեռնել է, կազմակերպել է ու հավատացել է դրան, հենց նա էլ պետք է հնարավորություն ու պատասխանատվություն ստանա այդ փոփոխություններն իրականացնելու համար», - նշեց նա։ «Պետք է անել ամեն ինչ մարդկանց հույսն արդարացնելու համար։ Բոլորս մեր տեղում պետք է ամեն բան անենք, որ Հայաստանն այլևս չունենա այն արատավոր երևույթները, որը մենք ունեինք և քննադատում էինք ու մինչ օրս էլ դրանք կան։ Խորքային ու համակարգային բազմաթիվ խնդիրներ կան, որոնց համակարգային լուծումներ պետք է տալ», - նշեց նա։ Մարուքյանը նկատեց, որ իրենք ի սկզբանե փողոցում չէին, որովհետև պնդում էին, թե պետք է պայքարել ոչ թե անձերի, այլ՝ համակարգի դեմ։ Նրա խոսքով՝ Սերժ Սարգսյանի հրաժարականից հետո, երբ նրան փորձեց փոխարինել Կարեն Կարապետյանը, դա արդեն համակարգային հարց դարձավ։ «Երբ դարձավ համակարգային պայքար, մենք եղանք փողոցում։ Մինչ այդ մենք ունեցել ենք դերակատարում, ես չէի ցանականա դրա մասին խոսել, որովհետև ինչ արել ենք, բոլորը տեսել են», - հավելեց նա՝ ընդգծելով, որ իրենք մեղավորություն չեն զգում, որովհետև մենակ չեն թողել Փաշինյանին և ինչ պայմանավորվածություն ունեցել են մինչ այս պահը, բոլորը կյանքի են կոչվել։