Երևանում 22-ամյա վարորդը «Toyota»-ով բախվել է «Suzuki»-ին

Այսօր՝ մայիսի 5-ին, ավտովթար է տեղի ունեցել Երևանում: Ժամը 16:00-ի սահմաններում Երևանի բնակիչ, 22-ամյա Տիգրան Մուրադյանը, Իսակովի պողոտայում՝ Կիլիկիա թաղամաս տանող ճանապարհի խաչմերուկին իր վարած «Toyota» մակնիշի 66 TM 661 համարանիշի ավտոմեքենայով բախվել է «Suzuki» մակնիշի 35 OF 993 համարանիշի ավտոմեքենային: Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով «Toyota»-ն կողաշրջվել է: Դեպքի վայր են ժամանել Ճանապարհային ոստիկանության 1-ին սպայական գումարտակի 2-րդ դասակի ծառայողերը՝ դասակի հրամանատար Թագվոր Թագվորյանի գլխավորությամբ: Վթարի հետևանքով «Toyota»-ի վարորդը, ում ավտոմեքենայից դուրս են բերել քաղաքացիները, տեղափոխվել է «Էրեբունի» բժշկական կենտրոն: Վթարի մասին Երևան ՃՈ օպերատիվ կառավարման կենտրոնի պատասխանատու հերթապահ Արմեն Հարությունյանը տեղեկությունը փոխանցել է ՃՈ հետաքննչական բաժանմունք, որտեղից ժամանել է հերթապահ խումբը՝ բաժանմունքի պետ Ալբերտ Նազարյանի և ավագ հետաքննիչ Արտյոմ Բաբիկյանի գլխավորությամբ: Դեպքի վայրում հավաքվածները նշում էին, որ վիրավորին հիվանդանոց է ուղեկցել Ա. Նազարյանը: Մինչ դեպքի վայրում հետաքննիչն ու ճանապարհային ոստիկանները իրենց գործողություններն էին կատարում, դեպքի վայր ժամանեց մի հաստափոր տղամարդ, ով փորձում էր ոստիկաններին համոզել, որպեսզի «Toyota»-ն տուգանային հրապարակ չտեղափոխվի և ճանապարհային ոստիկանները մոռանան «Toyota»-ի մասնակցութամբ վթարի մասին: Հաստափոր քաղաքացին երբ տեսավ, որ վթարը տեսանկարահանվում է, սկսեց քթի տակ անհոդաբաշխ արտահայտություններ անել և սպառնում էր, որ եթե վթարի մասին նյութ հրապարակվի, ինքը հաշվեհարդար է տեսնելու: Նա հայհոյանքներ տալով սկսեց մեղադրել լրագրողներին՝ երկիրը քանդելու, մարդկանց դժբախտություններում ուրախանալու մեջ: Հետաքննիչ Ա. Բաբիկյանի հանձնարարականով ավտոմեքենաները տեղափոխվեցին Երևանի ՃՈ հատուկ պահպանվող տարածք: Հաստափոր քաղաքացու կատարածի մասին ոստիկանությունը կարող է նշված նյութը ընդունել որպես հաղորդագրություն՝ լրագրողի աշխատանքը խոչընդոտելու մեջ: Ճանապարհային ոստիկանությունը պարզում է «Suzuki»-ի վարորդի ինքնությունը: Լուսանկարները՝ Գագիկ Շամշյանի Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: