«Երևանյան «մայդան». Ժիրինովսկու նոպան բռնեց

ՀՀ վարչապետի թեկնածու Նիկոլ Փաշինյանը երեկ հանդիպումներ է ունեցել Հայաստանում Ռուսաստանի, ԱՄՆ-ի, Վրաստանի և ԵՄ դեսպանների հետ: Այս մասին Փաշինյանը գրառում է կատարել իր ֆեյսբուքյան էջում: «Հանդիպումներ ունեցա Հայաստանում ՌԴ արտակարգ և լիազոր դեսպան Իվան Վոլինկինի, Հայաստանում ԱՄՆ արտակարգ և լիազոր դեսպան Ռիչարդ Միլսի, Հայաստանում Եվրամիության դեսպան Պյոտր Սվիտալսկիի, Հայաստանում Վրաստանի արտակարգ և լիազոր դեսպան Գիորգի Սագանելիձեի հետ։ Դեսպաններին տեղյակ պահեցի ներքաղաքական ճգնաժամի հանգուցալուծման վերաբերյալ ձեռքբերված պայմանավորվածությունների մասին։ Նաև քննարկեցինք հարաբերությունների օրակարգին վերաբերող այլ հարցեր։ Հայաստանում հավատարմագրված դիվանագետների հետ հանդիպումները կշարունակվեն»,- գրել է Նիկոլ Փաշինյանը։ Արեւմտյան կառույցների ներկայացուցիչները, պաշտոնյաններն ու դեսպանները միաբերան շեշտում են, որ Հայաստանում իշխանության փոխանցումը պետք է անցնցում տեղի ունենա, եւ համապատասխանի ՀՀ սահմանադրության տառի ուն ոգում: Հատկանշական է, որ Ռուսաստանից մեկնաբանությունները, որոնք նախկինում զուսպ էին՝ այսօր անհանգստության նոտաներ են ի հայտ գալիս: Ամենօրյա ռեժիմով Ռուսաստանից հնչում են կասկածներ՝ Հայաստանի՝ Ռուսաստանի հանդեպ հավատարմության մասին: Օրեր առաջ, ինչպես հայտնի է, Երեւանում էր ՌԴ Պետդումայի անդամ Կոնստանտին Զատուլինի գլխավորած պատվիրակությունը: Նրանք հանդիպումներ էին ունենում Հայաստանում տարբեր կողմերի հետ՝ գործող իշխանություններից մինչեւ քաղաքական գործիչներ, փորձում հասկանալ, թե ինչ է կատարվում Հայաստանում եւ արդյոք նոր իշխանությունը պահելու է հավատարմությունը Ռուսաստանի նկատմամբ: Սակայն օրերս Մոսկվայից հնչել է հերթական հիստերիայի նոպան՝ «Կրեմլի ծաղրածու» համարվող Ժիրինովսկու կողմից: Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին Հայաստանում տեղի ունեցող իրադարձությունները կապել է ԱՄՆ-ի ազդեցության հետ և նշել, որ ԱՄՆ-ը սկսել է խաղադրույք կատարել ոչ թե մտավորականության, այլ երիտասարդության վրա։ Ըստ «ՌԻԱ Նովոստի»-ի՝ Ժիրինովսկին ասել է. «Երևանյան «մայդանը» ցույց է տալիս, որ Միացյալ Նահանգները սկսել են խաղադրույք կատարել ոչ թե մտավորականության վրա, ինչպես դա անում էին Ռուսաստանում և այլ երկրներում, որտեղ իրավիճակը սրելու փորձերը ձախողվեցին, այլ երիտասարդների վրա։  ԱՄՆ-ը հասկացել է, որ մտավորականությունն ավելի իներտ է և ոչ այնքան վճռական, հաճախ պատրաստ չէ կոշտ գործողությունների: Իսկ  երիտասարդները ցանկանում են, որ իրենց սերունդը զգա, թե ինչ է հեղափոխությունը և գործում են ավելի ագրեսիվ: Եվ դա արդյունքներ է տալիս»,- նշել է  Ժիրինովսկին: Ռուսաստանից թե՛Ժիրինովսկու, թե՛ հայկական ազգանուններով որոշ «սրտացավների», թե՛ այլ հիստերիկ նոպաներին ուշադրություն չարժե դարձնել, քանզի որքան ուշադրություն ես դարձնում, դրանք նոր թափ են առնում: Ժիրինովսկու «կոնրտոլ» պոռթկման նպատակը հայաստանյան ռեակցիան ստուգելն է, հետեւաբար, որքան դրանց սառնասրտորեն վերաբերել, այնքան լավ: Միայն այդ կերպ կարելի է ապացուցել անհանգիստ ռուսներին, որ հայաստանյան հասարակությունում կարող են տեղի ունենալ գործընթացներ, որոնց բոլորովին էլ պարտադիր չէ, որպեսզի ռուսներն էլ խառնվեն: Թամար Բագրատունի