Չի բացառվում, որ խնդրենք ցանկացած պահի շրջափակել բոլոր փողոցները. Փաշինյան

«Մոսկվայում բնակվող Երվանդ Գեղամյանը ՌԴ-ից Նիկոլ Փաշինյանին հազար հատ վերնաշապիկ է ուղարկել, որի վրա պատկերված է Փաշինյանի նկարը եւ գրված է «դուխով»: Առաջարկ կա, որ ամսի 8-ին՝ վարչապետի ընտրության օրը, Հանրապետության հրապարակում լինել սպիտակ շապիկներով: Երվանդը, այն առաջարկին արձագանքելով, հազար հատ շապիկ է ուղարկել:Քաղաքացիների բազմաթիվ նամակներ ստանալուց հետո գնացել եմ  եւ «Նաիրի» ԲԿ-ում հետազոտվել  »,- երեկ ֆեյսբուքի իր էջի ուղիղ եթերով տեղեկացրել է  Նիկոլ Փաշինյանը: «Ամբողջական բժշկական հետազոտություն եմ անցել, որովհետեւ տարբեր օգտատերեր տարբեր ահազանգեր էին անում, որ հազում էի: Պարզվել է, որ ոչ մի առողջական խնդիր չունեմ: Կոկորդս բորբոքված է եւ դա կապված է ձայնիս ծանրաբեռնվածության հետ: Դեղերը կխմեմ եւ ամեն ինչ լավ կլինի:Բազմաթիվ հարցեր է ստանում՝ արդյո՞ք կա համոզմունք ամսի 8-ի վերաբերյալ»,- ասաց նա : «Մենք գիտենք, որ քաղաքական հայտարարությունների մակարդակով հայտարարություններ են հնչել, բայց իրականության մակարդակով մինչեւ փաստը չարձանագրվի, չենք կարող վերջնական բան ասել: Տեսանք, որ ՀՅԴ-ն հայտարարել էր, որ կողմ է քվերակելու, բայց նախորդ ընտրության ժամանակ Աղվան Վարդանյանը դեմ եղավ: Նման երեւույթներ կարող են էլի լինել եւ մենք պետք է պատրաստ լինենք, քանի որ ցանկացած պահի կարող է իրավիճակ փոխվել: Այդ պարագայում մենք պետք է եռակի ծավալներով իրականացնենք մեր գործողությունները՝ մեր հաղթանակը վերջնական արձանագրելու համար: Ասում են՝ չեք կասկածում, որ մայիսի  8-ին ինչ-որ բան կարող է այնպես չգնալ: Ես ասում եմ, որ չենք կասկածում, որ մեր ոչ բռնի, թավշյա հեղափոխությունը հաղթելու է: Նրանք, ովքեր կկանգնեն այդ ճանապարհին, նրանց քաղաքական ինքնաոչնչացում է սպասում: Քաղաքացիների 85-90 տոկոսը պաշտպանում է թավշյա հեղափոխությանը, եւ մենք այս քաղաքական իրավիճակը պետք է վերածենք քաղաքական իրողության»,- ասաց նա: