«Երբ հիասթափված ես, գաս վերհիշես այս շշմելու օրերն ու դուխով գնաս շարունակես ապրելն ու աշխատելը». Տիգրան Հակոբյան

Հեռուստատեսության եւ ռադիոյի ազգային հանձնաժողովի անդամ Տիգրան Հակոբյանը ֆեյսբուքյան իր էջում գրառում է կատարել այն մասին, թե որքան են այս օրերին միջազգային մամուլում խոսում Հայաստանի մասին, որքան հրաշալի ու ուշագրավ հոդվածներ կան. «Երկու շաբաթ է, ինչ աշխարհի տարբեր պարբերականներում լույս տեսած նյութերում մեր երկիրն է, ու մեզ սիրում են, գնահատում են, օրինակ են բերում, մեզ նախանձում են, մեզնով պարծենում ու զարմանում են, մեզ երկրպագում են, մեզ բացահայտում են: Եւ բացահայտում են ոչ թե անցյալով, Գառնի-Գեղարդով, Նարեկով, Ցեղասպանությամբ ու տոլմայով, այլ ներկայով: Խելագարության չափի հասցնող կիրթ ու սիրուն ջահելներով, անարդարությունն ու բռնությունը մերժող քաղաքացիներով, ժողովրդի անհավատալի ինքնակազմակեպմամբ, սիրո եւ հավատքի չտեսնված մթնոլորտով ու պատկերներով: Սա այն փափուկ ուժն է, որով մենք կարող ենք գրավել աշխարհի համակրանքը: Սա այն դրսեւորումներն են, որոնք ոչնչացնում են մեր միջի «վատ երկրում» ապրելու բարդույթը: Հարյուրավոր շշմելու, հուզիչ տեքստեր, տեսանյութեր եւ լուսանկարներ են լույս տեսել համաշխարհային տեղեկատվական հոսքերում: Դրանք պետք է պահպանվեն: Իսկ հետո կարելի է մշտական գործող մի ինտերակտիվ ցուցահանդես կազմակերպել, ու երբ հիասթափված ես, գալ վերհիշել այս շշմելու օրերն ու դուխով գնալ շարունակել ապրելն ու աշխատելը»: