ՀՀԿ-ից ովքե՞ր են Փաշինյանին ձայն տալու

Հանրապետական կուսակցությունը փրկում է ոտքի տակ ընկած արժանապատվությունը։ Մեկ օրվա մեջ ընդունելով Սերժ Սարգսյանի խոսքերի ճշմարտացիություն՝ «Նիկոլ Փաշինյանը ճիշտ է, իրենք սխալ», ՀՀԿ-ն դեմ քվեարկությունից հետո եւ կողմ-ից առաջ հայտնվել էր անհարմար դրության մեջ։ Եւ այսօր ԱԺ-ում պատգամավորները փորձում էին խմբագրել նախկին խոսքերը եւ իրավիճակից պատվով դուրս գալ, ի դերեւ հանելով այն քննադատությունները, որ իրենք չեն տարբերվում Փաշինյանից, ով փոխել է արտաքին քաղաքականության վերաբերյալ իր դիրքորոշումը։ Խմբակցության ղեկավար Վարհրամ Բաղդասարյանը ոչ ավել, ոչ պակաս կացնային հայտարարություն արեց՝ ասելով, որ ՀՀԿ-ն մայիսի 8-ին էլ է միասնական դիքորոշում դրսեւորելու, այսինքն դեմ է քվեարկելու, ինչպես երեկվանից հայտարարում են բազմաթիվ պատգամավորներ։ Հարցին, թե խմբակցության մեջ կլինեն պատգամավորներ, որոնք կո՞ղմ են քվեարկելու Փաշինյանի թեկնածությանը, ՀՀԿ խմբակցության ղեկավարն ասաց. «Եթե չքվեարկեն, ո՞նց պետք է անցնի: Ես խնդրում եմ այդ հարցերը թողեք մեզ, թե ինչպիսի որոշում կկայացնենք»: Նշենք, որ մայիսի 1-ին ԱԺ-ում չհաջողվեց վարչապետ ընտրել, քանի որ ՀՀԿ խմբակցությունը դեմ քվեարկեց Նիկոլ Փաշինյանի թեկնածությանը: Դրանից հետո ՀՀԿ խմբակցությունը նոր որոշում է կայացրել, որ մայիսի 8-ին կայանալիք վարչապետի ընտրության երկրորդ փուլում իրենք թեկնածու չեն առաջադրի եւ կաջակցեն, որ պատգամավորների 1/3-ի կողմից ներկայացված թեկնածուն ընտրվի:Սակայն երեկվանից մենք լսում ենք միայն դեմ քվեարկողների մասին, սկսած կուսակցության մամլո խոսնակ Էդուարդ Շարմազանովից, քարտուղար Գագիկ Մելիքյանից, Արտաշես Գեղամյանից ու Հայկ Բաբուխանյանից մինչեւ անկուսակցական Գեւորգ Կոստանյան։ Վերջինինիս լրագրողները հիշեցրեցին, որ Նիկոլ Փաշինյանը հայտարարել է, որ ամեն ինչ անելու է՝ Մարտի 1-ը բացահայտելու համար, դուք մտահոգություններ չունե՞ք՝ Գեւորգ Կոստանյանը պատասխանեց. «Ոչ, չունեմ մտահոգություն, իսկ ձեր ենթադրությունները, անկեղծ ասած, բացարձակ հիմնազուրկ են, մի քիչ զուսպ եղեք ձեր գնահատականների մեջ»: Նշենք, որ Փաշինյանին սատարելու մասին հայտնել են նրա ղեկավարած «Ելք» խմբակցությունը, «Ծառուկյան» ու «Դաշնակցություն» խմբակցությունները։ Միասին նրանք 45 պատգամավոր ունեն, եթե հաշվի առնենք Փաշինյանին, որը չի կարող ինքն իրեն սատարել, և Աղվան Վարդանյանին, որը դեմ է Փաշինյանին։ Վարչապետ ընտրվելու համար նա պետք է 53 քվե ստանա։ Այսպիսով, ընտրվելու համար Փաշինյանին ութ ձայն է պետք ՀՀԿ-ից։ Սակայն կուսակցությունում դեռ չեն հայտնում` ովքեր են կողմ քվեարկելու։ Երկու օրերի ընթացքում ՀՀԿ-ական պատգամավորների հրապարակային հայտարարությունների հիման վրա կարելի է միայն արձանագրել, որ ՀՀԿ-ից առնվազն չորս ձայն արդեն Փաշինյանն ունի։ Նրանք են պատգամավորներ Կնյազ Հասանովը՝ քրդական համայնքի ներկայացուցիչ, Արսեն Միխայելովը՝ ասորական համայնքի պատգամավոր, Ֆելիքս Ցոլակյանը, որը ՀՀԿ խմբակցությունից միակն էր, ով առաջին փուլում կողմ քվեարկեց եւ Սամվել Ալեքսանյանը։ Վերջինս լրագրողներին ասել է, որ ինքը ժողովրդի թեկնածուի կողքին է ու նրան է քվեարկելու, նրան չի վախեցրել Փաշինյանի հայտարարությունը, որ վերացնելու է մոնոպոլիաները․«Թող վերացնի, ես մենակ ուրախ կլինեմ» ասել է Ալեքսանյանը։ Արդեն երեւում է, որ ՀՀԿ-ն կպնդի իր դիրքորոշումը՝ հայտարարելով, որ դեմ է Փաշինյանին, սակայն անհրաժեշտ թվով պատգամավորների կուղղորդի, որպեսզի չտապալվի ընտրությունը։ Անի սահակյան