ՀՀԿ-ից դուրս գալը այս օրերին կլիներ դավաճանություն. Լևոն Ալթունյան

«Մենք ուրախ էինք, որ միմյանց հետ հաջողվեց աշխատել, ուրախ էինք, որ մենք բոլորս հասկացանք՝ թիմը իսկապես կայացել էր և թիմը իրար հանդեպ բարեհամբույր, բարենպաստ պայմաններ էր ստեղծում աշխատանքի ընթացքում», -    կառավարության նիստից հետո ասաց  Առողջապահության նախարարի ժամանակավոր պաշտոնակատար Լևոն Ալթունյանը: «Բաժանվելը միշտ էլ տխուր նոտա է: Մարդկային կապերը խզելը տխուր նոտա է, ամեն մեկը կայացած մասնագետ է, ունի իր տեղը, բայց, իհարկե, այսպիսի կանոնավոր հանդիպումները կդադարեն:Վարչապետը բոլորին շնորհակալություն հայտնեց, մաղթեց լավ ապագա բոլորին», - ասաց նա: Նախարարի ժամանակավոր պաշտոնակատարն ասաց, որ մարդկանց դժգոհությունը վերջին մեկուկես, կամ երկու տարին չէ և նույնիսկ վերջին տասը տարին չէր կուտակված: Ինչ վերաբերում է հարցին, թե կաշխատի Նիկոլ Փաշինյանի թիմում, եթե նման առաջարկ լինի, Լևոն Ալթունյանն ասաց, որ դա սուրճի բաժակի շուրջ կանխատեսումներ են: «Այսօր ես այդպիսի կանխատեսումներ չեմ կարող անել, ես գիտեմ, որ այսօր մենք նախարարությունում ունենք մշակված ծրագիր, որն իրականացնելը դժվար բան չէ: Ես կարծում եմ, որ Նիկոլ Փաշինյանը կգա իր թիմով և ամեն ինչ նորմալ կլինի», - ասաց նա և նշեց, որ իրենք ինչ որ պատրաստել են, դրանից մեկնարկելն ավելի հեշտ ու ավելի արդյունավետ կլինի, քան թե ժամանակին իրենց համար էր եղել: «Դուք գիտեք՝ հաշվի առնելով, որ իմ հանրապետական լինելը պայմանավորված է իմ կառավարությունում աշխատելով և այն բանով, որ ես հանրապետական ընդունվեցի, որպեսզի կարողանամ օգտակար լինեմ և «պարտիային» և ժողովրդին, ես չեմ կարող այսօր ինչոր ռազմավարական քայլեր, կամ կանխատեսումներ մեկնաբանել, առավելևս, դրանց ընդունման ժամանակ ես չեմ մասնակցել և չգիտեմ այդ հարցերի ամբողջ պալիտրան».-իր ապագա կուսակցական գործունեության մասին ասաց նախարարի պաշտոնակատարը: Ճշտող հարցին՝ այսինքն՝ պարտադրվա՞ծ եք ընդունվել ՀՀԿ, նա ասաց՝ «իհարկե՝ ո՛չ»: Հարիցն՝ այս օրերին մի պահ չի՞ մտածել ՀՀԿ-ի դուրս գալու մասին, նա ասաց. «Ես այնպես կփորձեմ անել, որ իմ կյանքի ցանկացած քայլ պայմանավորված լինի տրամաբանությունով և տրամաբանական շարունակություն ունենա և վերջում պարզ լինի, որ իմ քայլերը ճիշտ էին»: Նա նշեց, որ անտրամաբանական կհամարեր իր՝ ՀՀԿ-ից դուրս գալը, առավելևս, որ «այսօր Հանրապետականը ապրում է ոչ հեշտ «պիրիուդ»: «Դա կլիներ դավաճանություն», - ասաց Լ. Ալթունյանը։