Նիկոլի հետ պատրաստ եմ աշխատել որպես ընդդիմություն. Աշոտյան

Այսօր երկրում քաղաքական եղանակ ստեղծող թիվ մեկ անձնավորությունը Նիկոլ Փաշինյանն է, Ազգային ժողովի ամբիոնից հայտարարեց ԱԺ «Հանրապետական» խմբակցության պատգամավոր Արմեն Աշոտյանը։ «Շնորհավորում եմ, պարոն Փաշինյան, Ձեզ մոտ ստացվեց։ Երբ մի քանի շաբաթ առաջ Դուք փորձում էիք, գնում հրապարակում կանգնում էիք, այստեղ նստածներից ոչ ոք, բացի ձեր կուսակցության անդամներից, Ձեզ չէր հավատում։ Դուք ներշնչեցիք հույս, Դուք ներշնչեցիք էներգիա, ոգևորեցիք մարդկանց։ Այս 3 նախագահական ժամկետներից հետո՝ Լևոն Տեր-Պետրոսյան, Ռոբերտ Քոչարյան և Սերժ Սարգսյան, Սերժ Սարգսյանը գնաց՝ իր հետ տանելով պետականության վերստեղծման պահից առ այսօր կուտակված բոլոր պետական, քաղաքական ձախողումների ու մեղքերի ծանրությունը», - հայտարարեց Արմեն Աշոտյանը։ Նա խնդրեց այլևս չշահարկել Սերժ Սարգսյանի անունը. «Դուք ասացիք՝ «Մերժիր Սերժին», Սերժ Սարգսյանը գնաց, չուզեցիք Կարեն Կարապետյանին, նա չառաջադրվեց, մերժեցիք ՀՀԿ-ին՝ մենք որևէ թեկնածու չենք առաջադրել։ Այս հաջողությունը ձերն է, այդ արմատների մեջ մենք մեր մեղավորությունն ունենք, և այս դահլիճում գրեթե չկա հանրությանը հայտնի գեթ մեկ գործիչ, որ իր մեղքի բաժինը չունի այս խնդիրների ծագման մեջ։ Երկրին պետք է ընդդիմություն, այլակարծություն, ժողովրդավարությունը տոտալիտար ճնշման մեխանիզմներով չի հաստատվում, հնարավոր չէ այդպես»։ Այնուհետև դիմելով Սեյրան Սարոյանին, որն իր ելությում ասել էր, թե Աշոտյանից ինչ ըդդիմադիր գործիչ, ասաց. «Իմ սիրելի գեներալ, քո և Նիկոլի հետ պատրաստ եմ աշխատել որպես ընդդիմություն, անգամ առանց Նիկոլի եմ պատրաստ աշխատել ընդդիմություն»։