«Մենաշնորհների վերացումն ընդամենը ժամերի խնդիր է». Նիկոլ Փաշինյան
Մենաշնորհների վերացումն ընդամենը ժամերի խնդիր է։ Այս մասին այսօր ԱԺ հատուկ նիստում հայտարարեց ՀՀ վարչապետի թեկնածու Նիկոլ Փաշինյանը՝ պատասխանելով ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանի հարցին, թե ինչպե՞ս է վերացնելու քաղաքական հրահանգով տրված մենաշնորհները։ «7.5 տոկոսանոց տնտեսական աճը զրոյական ազդեցություն ունի ժողովրդի կյանքում: Կցանկանայինք լսել նաև Ձեր քայլերը մենաշնորհների դեմ պայքարում»,- ասացԱժ փոխնախագահ, «Ծառուկյան» խմբակցությունից Միքայել Մելքումյանը: Ըստ Ն.Փաշինյանի՝ այսօր ՀՀ-ում օրենսդրությամբ մենաշնորհ չկա, որևէ մեկի համար որևէ բան ներկրելու արգելք չկա, բայց բոլորը գիտեն, որ այդ արգելքները փաստացի կան։ Նա հայտարարեց, որ այսօր վարչապետ ընտրվելու դեպքում վաղվանից որևէ ապրանքատեսակի գծով ներկրման արգելք չի լինելու։«Մենաշնորհների վերացումը ժամերի խնդիր է: Եթե ընտրվեմ վարչապետ, վաղվանից որևէ ապրանքատեսակի գծով ներկրման արգելք չի լինելու ու այս մասին պատրաստվում եմ պաշտոնապես ծանուցել ՀՀ-ում գրանցված բոլոր ընկերություններին, իրավաբանական անձանց, անհատ ձեռնարկատարերին: Ինձ բազմաթիվ մարդիկ են մոտեցել ու հայտարարել են իրենց ունեցած արգելքների մասին»,- ասաց Փաշինյանը:
Հետևեք մեզ Viber-ում
