Հանրապետականն այլևս Հայաստանում չունի իշխանություն և չի ունենալու. Նիկոլ Փաշինյանը՝ Ալիկ Սարգսյանին

Այսօր ՀՀ նախկին ոստիկանապետ, ՀՀԿ-ական պատգամավոր Ալիկ Սարգսյանը, դիմելով Նիկոլ Փաշինյանին, հարցրեց, թե  ընդունենք Փաշինյանը վարչապետ չընտրվեց, պայքարի ի՞նչ ձև է ընտրելու, այնուհետև հավելեց. «Հարգում եմ ժողովրդավարությունը և շարժումը բացահայտ ժողովրդավարության դրսևորում էր: Չէի ցանկանա, որ Ձեր խոսքում երբևէ հնչեր, «կամ ու կամ» դրսևորումը: Եզրույթի նկատմամբ ուշադիր եղեք»: «Պարոն Սարգսյան, ձեզ տրված ժամանակահատվածում այդ վերահսկողությունը կիրականացնի ձեր խմբակցությունը։ Եվ երբ դուք ասում եք՝ ցանկացած իշխանության համար հետևությունների տեղ կա, որպեսզի հետագայում շտկի իրավիճակը, եթե դուք  նկատի ունեք Հանրապետականի իշխանությունը, դուք սխալվում եք, որովհետև Հանրապետականն այլևս Հայաստանում չունի իշխանություն և չի ունենալու։ Եվ ինչքան այս իրողությունը շուտ արձանագրենք, այնքան լավ բոլորի համար»,- պատասխանեց Փաշինյանը։ Ըստ նրա՝ խնդիրն այն չէ, որ իրեն վարչապետ են ընտրում, այլ խնդիրն այն է, թե նպաստո՞ւմ են այս ճգնաժամի լուծմանը, թե՞ քաղաքական ճգնաժամը պետք է լուծվի առանց ՀՀԿ-ի մասնակցության։ «ՀՀԿ-ն ՀՀ-ում այլևս չունի իշխանություն ու չի ունենալու: Խնդիրը նրա մասին չէ՝ ով ընտրվի վարչապետ, այլ՝ դուք նպաստո՞ւմ եք քաղաքական ճգնաժամի լուծմանը, թե՞ պետք է լուծվի առանց ձեր մասնակցության: Չեմ պատկերացնում իրադարձությունների զարգացման սցենար, որ մեզ դուրս բերի բաց ձեռքերի տրամաբանությունից»: