«Թող որևէ հանրապետական չակնկալի, որ մենք պետք է շնորհակալություն հայտնենք, որ մեզ պադիեզդներում չեք գնդակահարել, բանտերում չեք թունավորել». Նիկոլ Փաշինյան

Վարչապետի թեկնածու Նիկոլ Փաշինյանին ՀՀԿ պատգամավոր Կարինե Աճեմյանը նկատեց, որ ստացվում է, որ նա պաշտպանում է իշխանության կողմից վարած արտաքին քաղաքականությունը: Նա նշեց, թե երբ վարչապետ ընտրվի, Փաշինյանը պաշտպանելու է այն, ինչ նախկինում մերժել է: Ըստ նրա՝ կայացած քաղաքացական հասարակության, ազատ մամուլի և մյուս ժողովրդավարական կառույցների շնորհիվ է Փաշինյանը հաջողություն ունեցել: Աժ-ում շարունակվում է պատգամավորների ու Նիկոլ Փաշինյանի միջև հարցուպատասխանը: Վարչապետի թեկնածուն՝ արձագանքելով ՀՀԿ-ական Կարինե Աճեմյանին, ասաց. «Էն, ինչ ՀՀ-ում ունի քաղաքացին, ունի բացառապես իր շնորհիվ: Անկախությունից ի վեր, էն տարածքը, որ ունենք, սանտիմետր առ սանտիմետր ազատագրել ենք ապօրինության ու բեսպրեդելի ճիրաններից: Զոհվել են ՀՀ տասնյակ քաղաքացիներ, բանտերում են հայտնվել ՀՀ հարյուրավոր քաղաքացիներ ու թող որևէ ՀՀԿ-ան չակնկալի, որ մենք պետք է շնորհակալություն հայտնենք, որ մեզ պադիեզդներում չեք գնդակահարել, բանտերում չեք թունավորել: Որևէ մեկը չակնկալի, որ մեր հաղթանակների ու սկզբունքներիի համար պետք է շնորհակալություն հայտնենք որևէ մեկին, այդ ամենը նվաճել ենք քրտինքի, տառապանքների գնով»: Կարինե Աճեմյանը հարցրեց, թե  համոզվա՞ծ է, որ այս բեռը կարող է տանել, հատկապես, որ նրա հայրն էլ չի տեսնում Փաշինյանին որպես վարչապետ: Փաշինյանը նշեց, որ ինքը որևէ գործ չի սկսում, եթե համոզված չի լինում, որ այդ գործը տանելու է մինչև վերջ: