«Նիկոլ Փաշինյանը դեռ 2 ամիս անելիք ունի ուսապարկով». Կարինե Խոդիկյան

« Ինչպես պաշտոնապես հայտարարել է ՀՀԿ-ն, վարչապետի թեկնածու չի առաջադրելու, բայց ամեն ինչ դեռ առջևում է՝ կտեսնենք, թե ինչպես նրանք իրենց կդրսևորեն վաղը՝ վարչապետի ընտրությունների ընթացքում: Եթե փորձեմ բանաձևել, ապա պետք է ասեմ՝ շատ կարևոր ճակատամարտում բացարձակ հաղթանակ ենք կրել, բայց պատերազմը դեռ շարունակվում է»,-Հայելի ակումբում հրավիրված քննարկմանը նման հայտարարություն արեց  արձակագիր, դրամատուրգ Կարինե Խոդիկյանը: Շարժման ընթացքը հրապարակից աստիճանաբար տեղափոխվում է խորհրդարան, այսինքն՝ ինստիտուցիոնար դաշտ: Ահա այստեղ է, որ թե՛ Նիկոլ Փաշինյանը, թե՛ նրա համախոհների մերձավոր շրջանակը պետք է նախանշեն և տեսնեն այն բոլոր վտանգները, որ պարունակում է իր մեջ խորհրդարանական այսօրվա մեծամասնությունը: Որքան հասկանալի է՝ հանրապետականները չեն զիջելու և մինչև վերջ մնալու են ինչ-որ բան կորզելու ձգտումով: Փոխարենը, ինչպես հուշում է համաշխարհային պրակտիկան, նրանք իրենց առաջնորդի հրաժարականից հետո պարտավոր էին ողջ կազմով վայր դնել իրենց լիազորությունները, հայտարարեին իրենց ընդդիմադիր ուժ և հեռանային դաշտից: Այնինչ, այն, ինչ անում է ՀՀԿ-ն, ոչ այլ ինչ է, քան էժանագին առևտուր: Նրանք ոչ մի կերպ չեն ցանկանում հասկանալ, որ այս երկրում ամեն ինչ է փոխվել՝ և՛ ժամանակը, և՛ մարդիկ, և՛ մարդկանց համբերությունը: Սակայն, ըստ Կարինե Խոդիկյանի, Նիկոլ Փաշինյանի ընտրությամբ ամեն ինչ չի ավարտվի, որովհետև ամեն դեպքում հանրապետականները մեծամասնություն են կազմում և վարչապետի ցանկացած որոշում հանդիպելու է դիմադրության։ Սա նյարդերի, ֆինանսների, իշխանության պատերազմ է։ «ՀՀԿ-ն իր պայքարը պետք է շարունակեր ընդդիմադիր դաշտում։ Դա կլիներ բարոյական։ Հեղափոխությունը մտնում է ինստիտուցիոնալ դաշտ, և քանի որ Ընտրական օրենսգիրքը գրված է եղել ՀՀԿ-ի համար, ապա այստեղ արդեն խութեր են առաջանալու»։ Կարինե Խոդիկյանի պնդմամբ՝ Նիկոլ Փաշինյանն անգամ եթե կոստյում հագնի և սափրվի, դեռ 2 ամիս անելիք ունի ուսապարկով։