Հիմա ինչպե՞ս եք որոշելու եւ ինչպե՞ս եք ազատ արձակելու.Արփինե Հովհաննիսյանը քաղբանտարկյալների մասին

ՀՀԿ-ի խամբակցության անդամ,ԱԺ փոխխոսնակ  Արփինե Հովհաննիսյանը  ԱԺ-ում   «Ելք» խմբակցության կողմից վարչապետի թեկնածու առաջադրված Նիկոլ Փաշինյանի հետ հանդիպմանը անդրադարձավ «քաղաքական բանտարկյալների» խնդրին, որը բարձրաձայնում է ընդդիմությունը: Վկայակոչելով  ԵԽ բանաձեւը, որտեղ ներկայացված չափանիշներով, նրա խոսքով, Հայաստանում քաղբանտարկյալներ չկան: «Հիմա ինչպե՞ս եք որոշելու եւ ինչպե՞ս եք ազատ արձակելու, ընթացակարգը ո՞րն է», - հարց ուղղեց Արփինե Հովհաննիսյանը: «Քաղաքական ենթատեքստ ունեցող գործերին պետք է ցուցաբերել առանձնահատուկ մոտեցում:  Մենք պետք ունենանք հստակ չափանիշներ, գծենք շրջանակը եւ հարցին տանք ինստիտուցիոնալ լուծում: Քաղաքական ենթատեքստ ունեցող գործերին պետք է ցուցաբերել առանձնահատուկ մոտեցում եւ այդ մոտեցման միակ նպատակը հանրային համերաշխության ձեւավորումն է»,- ասաց Նիկոլ Փաշինյանը: Արփինե Հովվհանիսյանի՝ Եվրախորհրդի բանաձեւին հղում կատարելուց հետո Նիկոլ Փաշինյանն արձագանքեց, որ քաղաքական խնդիրներով հետապնդումների մեջ գտնվող անձանց մասով ՀՀ օրենսդրությունը մի քանի պրոցեդուրա է նախատեսում եւ այս հարցի լուծումը, նրա խոսքով պետք է միտված լինի հանրային համերաշխության հաստատմանը: «Այն, ինչ պետք է տեղի ունենա, պետք է տեղի ունենա օրենքների խստիվ պահպանմամբ: ՀՀ օրենսդրությունը մի քանի պրոցեդուրա է նախատեսում, թե ինչպես կարող է ազատազրկման մեջ գտնվող մարդն ազատ արձակվել: Կդիտարկվի, գուցե առանձին դեպքերում մի գործիք կիրառվի, մեկ այլ դեպքում՝ այլ գործիք: Պետք է ոչ թե նեղ թիմային որոշումներ կայացվեն, այլ ՀԿ-ների փորձագիտական կարծիքները հաշվի առնվեն: Մեր գործողությունները պետք է ունենան նպատակ, դա հանրային համերաշխության հաստատումն է: Մենք չենք կարող գնալ լուծումների, որոնք կբերեն նոր պրոբլեմներ», - ասաց նա: