Պետք է այնպես գործենք, որ հոնքը սարքելու տեղն աչքը չհանենք.Փաշինյանը՝Միհրան Հակոբյանին
Ամիսներ առաջ դուք դեմ եք եղել «Զինապարտության մասին» օրենքի փոփոխությանը և արդյո՞ք այս ընթացքում կարծիքը փոխվել է.նման հարց ՀՀ վարչապետի թեկնածու, ԱԺ «Ելք» խմբակցության պատգամավոր Նիկոլ Փաշինյանին ուղղեց իշխող «Հայաստանի Հանրապետական կուսակցություն» խմբակցության հետ հանդիպմանը ՀՀԿ խմբակցության պատգամավոր Միհրան Հակոբյանը: «Քննարկումների ընթացքում եղել են բազմաթիվ առաջարկներ, թե ինչպես պետք է շարունակել բարեփոխումները բանակում և Զինված ուժերում: Կային գաղափարներ, և կշարունակենք այդ գաղափարները քննարկել, վերլուծել ու այդ գաղափարների ռացիոնալ հատվածին լուծումներ տալ: Էլի եմ ասում՝ իրողությունների հետ պետք է հաշվի նստել, բոլոր ոլորտներում մենք ցնցումային ճանապարհով փոփոխություններ չենք կարող անել, գնալու ենք կառուցողական փոփոխությունների ճանապարհով»,- ասաց Փաշինյանը: «Քաղաքական ուժերի հետ հանդիպման ընթացում մի շարք քննադատություններ եմ լսել գործող համակարգի հետ կապված, բայց արդյունքում եկել են ընդհանուր հայտարարի: Բոլոր հարցերը պետք է մանրամասն քննարկենք և զգուշ լինենք լուծումներ տալուց առաջ:Պետք է այնպես գործենք, որ հոնքը սարքելու տեղն աչքը չհանենք: Կան իրողություններ, որոնք պետք է փոխվեն ու կփոխվեն: Փոփոխությունները դրական լինելու համար անհրաժեշտ է, որ դրանք լինեն նախապատրաստված, մտածված ու պլանավորված, քանի որ փորձը ցույց է տվել, որ ինչքան հապճեպ են փոփոխությունները, այդքան բերում են հարակից խնդիրներ»,-շարունակեց Նիկոլ Փաշինյանը: Միհրան Հակոբյանը հիշեցրեց Նիկոլ Փաշինյանի որոշ հայտարարություններ. «Երբ ՀՀ 3-րդ նախագահն ասում է, որ պետք է իրողությունների հետ հաշվի նստել, Դուք ասում էիք՝ ստախոս է: Հիմա Ձեր՝ ԵԱՏՄ-ի, ՀԱՊԿ-ի մասին հայտարարությունները ո՞նց եք որակում, նույն կերպ չի՞ ստացվում»: Փաշինյանն էլ հակադարձեց, որ եթե ինքը հերքեր, որ 2013թ.-ին դեմ է քվեարկել ՀՀ-ի՝ ԵՏՄ-ի անդամակցությանը, ապա Հակոբյանի ասածը տրամաբանական կլիներ: Նա շեշտեց՝ կան քննադատություններ, որոնց հետ պետական ու քաղաքական գործիչները պետք է հաշվի նստեն:
Հետևեք մեզ Viber-ում
