Սատանան դետալների մեջ է. Փաշինյանը՝ Նաղդալյանին

«Նոր կարգավիճակով Ձեր կարծիքները ցույց տվեցին, որ առանձնապես մեծ, գլոբալ տարբերություն արտաքին քաղաքականության հարցերում, Արցախի խնդրի կարգավորման, ԵԱՏՄ-ի, անգամ նաև կադրային քաղաքականության հարցերում մեր իշխանության վարած քաղաքականության հետ առանձնապես չկան: Սա իմ դիտարկումն է: Ամենամեծ տարբերությունը, կարծեք թե, համբերատարության մասով նկատեցի, բայց մենք էլ ենք համբերատար աշխատել, պարո՛ն Փաշինյան, այնպես չէ, որ անհամբեր  ենք եղել»,-ԱԺ-ում  ԱԺ ՀՀԿ խմբակցության և ՀՀ վարչապետ Նիկոլ Փաշինյանի հանդիպմանը հարց ուղղեց Հերմինե Նաղդալյանը: «Ադրբեջանական մամուլը վերջին օրերին մի շարք պետական և քաղաքական գործիչների շուրթերով  իր գոհունակությունն է հայտնել այն իրադարձությունների կապակցությամբ, որ կատարվում են Հայաստանում և հատկապես նշում, որ ռազմաքաղաքական էլիտան հեռանում է, և նրա փոխարեն գալու է ժողովրդավարական հայացքներով էլիտան, որոնց  հետ Ադրբեջանը պատրաստ է համագործակցել ԼՂ խնդրի հարցում: Դուք որևէ վտանգ զգո՞ւմ եք հնարավոր ռազմական և այլ զարգացումների իմաստով, որ կարող են լինել Ադրբեջանի կողմից»,-հարցրեց Նաղդալյանը: «Եթե խոսում եք    ինչ-որ պրոցեսների շարունակականության մասին, ապա շարունակականությունը չի նշանակում նույնականություն: Ինչպես գիտեք՝ սատանան դետալների մեջ է: Ինչ վերաբերում է քաղաքական էլիտայի վերաբերյալ Ադրբեջանի կողմից հնչող հայտարարություններին՝ կարծում եմ, որ մեր զինված ուժերի կայունությանը,  այդ թվում՝ նաև կադրային կայունությանը ոչինչ չի սպառնում: Մեր տրամադրվածությունը կադրային ջարդ իրականացնելը չէ:  Ես կարծում եմ, որ Ադրբեջանում ոչ թե ուրախանալու, այլ անհանգստանալու բան ունեն: Եթե նույնիսկ Ադրբեջանում ուրախացել են՝ նրանք նույնպես իրավիճակը սխալ են գնահատում»,-պատասխանեց  Փաշինյանը: Որքանով հասկանալի էր, զինված ուժերի հետ կապված կադրային խնդիրների մեջ էլ Փաշինյանը շարունակական է լինելու, ինչն ուրախալի է,արձագանքոց Նաղդալյանը: Փաշինյանն ասաց, որ ինքն այլ բան է ասում, իրենք խնդիր ունեն համերաշխության մթնոլորտ հաստատելու, որովհետև համերաշխության մթնոլորտում են հնարավոր լինում հարցերի արդյունավետ քննարկումն ու լուծումներ գտնելը: