Եթե կրակոց լինի Մովսես գյուղի ուղղությամբ Ձեր վարչապետության օրոք, որո՞նք են լինելու Ձեր քայլերը.ՀՀԿ-ն՝Փաշինյանին

ԱԺ փոխնախագահ Էդուարդ Շարմազանովը ԱԺ-ում  հայտարարեց, որ Փաշինյանն այսօր շատ լավ ապացուցեց, որ ՀՀ իշխանությունների արտաքին քաղաքականությունը բխել է ՀՀ պետական շահերից, և մուտքը ԵԱՏՄ սպասարկել է ՀՀ պետական շահը։ «Չեմ ուզում Ձեզ հետ բանավեճի մեջ մտնել, ես ընդամենը արձանագրեցի, որ պետական և քաղաքական գործիչները պարտավոր են հաշվի նստել իրողությունների հետ։ Մենք մեր երկրի պատմության ընթացքում շատ ենք բախվել իրավիճակների, երբ քաղաքական և պետական գործիչները ակնհայտ իրողությունների հետ հաշվի չեն նստել, և դա բերել է որոշակի ցնցումների:Ինչպես իշխանություն, այնպես էլ ընդդիմություն լինելը գործառույթ է, ունի գործողությունների, ազատությունների և գործիքակազմերի որոշակի շրջանակ, որոնք միշտ չէ, որ նույնական են առնվազն 100%-ով»,- պատասխանեց Ն.Փաշինյանը։ ՀՀԿ-ական պատգամավոր Սամվել Ֆարմանյանը հիշեցրեց Նիկոլ Փաշինյանի խոսքը ՀԱՊԿ-ի մասին, որ ՀԱՊԿ-ի պայմանագիրն արժանանալու է Սևրի պայմանագրի ճակատագրին, և հարցրեց, թե ի՞նչ փաստարկների հիման վրա է նա այդպես մտածել, և արդյո՞ք ՀԱՊԿ գործընկերների հետ առաջիկա հանդիպմանը կբարձրացնի Հայաստանին աջակցության հարցը. «Դիցուք, եթե վաղը լինում է կրակոց Մովսես գյուղի ուղղությամբ Ձեր վարչապետության օրոք, որո՞նք են լինելու Ձեր քայլերը»։ Ս.Ֆարմանյանը նաև նկատեց, որ շարժման ընթացքում Նիկոլ Փաշինյանն իր ելույթներում Ռուսաստանի հետ հարաբերությունների մասին խոսելիս գոնե 1 անգամ չի օգտագործել՝ «ռազմավարական դաշնակցային թեկնածու», և հարցրեց, թե ինչո՞ւ։ Ն.Փաշինյանը պատասխանեց, որ շարժման ընթացքում իրենք չեն անդրադարձել արտաքին քաղաքականությանը, շարժման հիմքում աշխարհաքաղաքական որևէ կոնտեքստ չկա, այն մաքուր հայաստանյան պրոցես է, որ կենտրոնացած է ներքին օրակարգի հարցերի վրա.