Ոչ մի գործողություն չիրականացնել. Փաշինյան

Ելույթ ունենալով Հանրապետության հրապարակում՝ Նիկոլ Փաշինյանն ասաց, որ վերջի մի քանի օրերին հաջողվեց հաղթանակներ գրանցել: «Սիրելիʹ ժողովուրդ, ՀՀ հպարտ քաղաքացիներ, վերջին 2 օրերին ՀՀ քաղաքացիներին՝ ձեզ, հաջողվեց վերջնականորեն և անշրջելիորեն բեկել ներքաղաքական իրավիճակը Հայաստանում: Այն, ինչ տեղի ունեցավ նախորդ օրը դեպի Գյումրի մեր ավտոերթի և երեկ՝ դեպի Իջևան, Վանաձոր, Ապարան և Երևան ճանապարհին, ակնհայտ դարձրեց, որ ՀՀ-ում թավշյա, ոչ բռնի, ժողովրդական հեղափոխության հաղթանակն անշրջելորեն անշրջելի է: Ճանապարհներին մենք ստիպված էինք մի քանի տասնյակ անգամ դադար առնել, որովհետև Հայաստանի այդ հատվածներոմ, ճամփեզրին ընկած գրեթե բոլոր գյուղերի ու քաղաքների բնակիչները տասնյակներով, հարյուրներով, հազարներով տոնելու էին եկել ՀՀ քաղաքացիների հաղթանակը: Այն հաղթանակը, որ քաղաքացիները՝ ձեզնից յուրաքանչյուրը սեփական ձեռքերով է կերտել: Եվ այդ հաղթանակի արդյունքներն անշրջելիորեն ճանաչվելու են: Հիմա արդեն ԱԺ 3 խմբակցություններ՝ ՀՅԴ-ն, ԵԼՔ և Ծառուկյան դաշինքները, հայտարարել են, որ մայիսի մեկին քվեարկելու են ժողովրդի թեկնածուի օգտին»: Այնուհետև տեղեկացրեց, որ վաղ առավոտից հանդիպումներ է ունենալու: «Վաղը առավոտից ես շատ կարևոր աշխատանք ունեմ Ազգային ժողովում: Պետք է հանդիպումներ ունենամ խորհրդարանական բոլոր խմբակցությունների ներկայացուցիչների հետ, որպեսզի այդ քննարկումների արդյունքում օրվա վերջում Ձեզ կարողանամ տեղեկատվություն տալ, որ ձեր առաջադրած վարչապետի թեկնածուի ընտրությունը մայիսի մեկին երաշխավորված է»,- ասաց նա և խնդրեց վաղը դադարեցնել ակցիաները և քաղաքացիական անհնազանդության ոչ մի գործողություն չիրականացնել: Նիկոլ Փաշինյանը կոչ արեց նաև դադարեցնել հանրապետական պատգամավորների հետ զանգերի, նամակների միջոցով կոնտակտի դուրս գալը և նրանց առջև պահանջ դնելը: Փաշինյանը տեղեկացրեց, որ վաղը 17:00-ից ինքը լինելու է Գարեգին Նժդեհի հրապարակում, որտեղից քայլերթով շարժվելու են Հանրապետության հրապարակ, որտեղ էլ հանրահավաքի ժամանակ միասին քննարկելու են հաջորդ օրվա իրենց անելիքները: