«Հեռացե՛ք, թողե՛ք ժողովուրդն ազատ ապրի, վրեժխնդիր չենք լինելու, միայն հեռացե՛ք». Սասուն Միքայելյան
Վանաձորում կազմակերպված հանրահավաքի ժամանակ «Քաղաքացիական պայմանագիր» կուսակցության վարչության նախագահ Սասուն Միքայելյանն իր ելույթը սկսեց Գարեգին Նժդեհի հետևյալ խոսքերով. «Երբ ազգը դառնում է բանակ՝ նա երբեք ծնկի չի գա»։ «Այսօր հաղթանակած ժողովուրդը, որն այս իշխանությունների ձեռքով տարիների ընթացքում անհավատության, աղքատության, արտագաղթի շեմին է հասել, նորից դարձել է բանակ։ Բանակ է դարձել՝ իր ազատության, անկախության համար։ Ձեզ այս իշխանությունները դրդել են, որ համախմբվեք։ 10-15 տարի իշխում են, մի լավ բան չտեսանք. այս ժողովուրդը մուրացկան չէ, մենք աշխարհահռչակ ազգ ենք»։ Սասուն Միքայելյանն իշխանություններից խնդրեց հեռանալ.«Հեռացեք, թողեք ժողովուրդն ազատ ապրի, վրեժխնդիր չենք լինելու, չենք նմանվելու ձեզ, միայն հեռացեք: Նրանք ամեն ինչի կարող են գնալ, բայց այս բանակի դեմ չեն կարող գնալ: Խնդրում եմ վաղը, մյուս օրը, ով հնարավորություն ունի, եկեք Երևան: Եթե ոչ, ամսի 1-ին՝ սայլերով, էշերով, ոտքով լցվեք Երևան, վերցրեք ազատությունն ու հետ վերադարձեք»,- հայտարարեց Սասուն Միքայելյանը:
Հետևեք մեզ Viber-ում
