Ավտովթար Երևանում. բախվել են BMW-ն ու Mercedes-ը. վերջինն էլ՝ կայանված Opel-ին, Nissan-ին ու Mercedes-ին.կա վիրավոր/տեսաշար/

Երեկ՝ ապրիլի 27-ին, ավտովթար է տեղի ունեցել Երևանում: Ժամը 22:10-ի սահմաններում Օհանովի փողոցում բախվել են BMW մակնիշի 71 NX 007 համարանիշի և Mercedes մակնիշի 15 SO 002 համարանիշի ավտոմեքենաները, ինչի հետևանքով վերջինը բախվել է նաև կայանված Opel մակնիշի 35 LF 823 համարանիշի, Nissan մակնիշի 35 NV 767 համարանիշի և Mercedes մակնիշի 35 MZ 221 համարանիշի ավտոմեքենաներին, վերջինն էլ առաջ ընթանալով` «Եգեր» սրճարանի փայտյա ցանկապատին: Ինչպես հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղափոխվել է «Աստղիկ» բժշկական կենտրոն: Դեպքի վայր են ժամանել ճանապարհային ոստիկանության 1-ին սպայական գումարտակի 7-րդ դասակի աշխատակիցները: Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Արսեն Կարապետյանը տեղեկությունը փոխանցել է ճանապարհային ոստիկանության ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել է հետաքննչական խումբը՝ ավագ հետաքննիչ Սարգիս Գևորգյանի գլխավորությամբ, ում կողմից փաստի առթիվ նյութեր են նախապատրաստվում: Ոստիկանությունը պարզում է վարորդների և վիրավորի ինքնությունը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Սմբատ Պետրոսյանի