Կարենը որբ էր ու որբ երեխա թողեց

Երևան-Մեղրի ճանապարհին ավտովթարից մահացած պայմանագրային զինծառայող Կարեն Կարապետյանը  Արմավիրի մարզի Շենավան գյուղի բնակիչ է եղել: «30 տարեկան, երիտասարդ տղա էր, փոքր երեխա ունի: Արդեն 2 տարի պայմանագրային զինծառայող է: Աշխատող տղա էր ու ահավոր բան եղավ»,-Հայելի.am-ի թղթակցի հետ զրույցում ասաց  Շենավան համայնքի ղեկավար Արթուր Մկրտչյանը: «Մայրը հորից բաժանցված էր ու ինքը միակ տղան էր: Դժվարությամբ մեծացած, որբ տղա էր:  Ընտանիքին քեռիներն էին օգնում: Հիմա էլ իրա երեխան որբ մնաց»,- ասաց Մկրտչյանը: Մահացած զինծառայողներից Վահան Ղուկասյանն  էլ Արարատի մարզի Այգեզարդ գյուղից էր: Այգեզարդի գյուղապետի հետ չհաջողվեց զրուցել, սակայն գյուղապետարանի աշխատակիցը  հայտնեց , որ Վահան Ղուկասյանը 31 տարեկան էր: Մեր զրուցակիցը ցավով նշեց, որ Վահանի քույրն էլ անցած տարի է մահացել: Ավելի վաղ հայտնել էինք, որ 2016թ. մարտի 9-ին 23:00-ի սահմաններում, դեռեւս չբացահայտված հանգամանքներում, Երեւան-Մեղրի 80-րդ կմ-ում «Օպել» մակնիշի (վարորդ՝ 30-ամյա Կ. Կ.) ավտոմեքենան դուրս է եկել երթեւեկելի մասից եւ մոտ 250 մետր գլորվել է ձորը, ինչի հետեւանքով Կ. Կ.-ը եւ ուղեւոր, 35-ամյա Վ. Ղ.-ը տեղում զոհվել են: Աստղիկ Ավագյան