Չարենցավանցիները փակելու են Սևան-Երևան միջպետական ճանապարհը

Չարենցավանի բնակիչ Վարդան Մակինյանը այսօր բոլոր մտահոգ չարենցավանցիների անունից հայտարարություն է արել, որ արդեն 4-րդ օրն է՝ չեն աշխատում Չարենցավան-Երևան ավտոբուսները, իսկ որոշ անբարեխիղճ տաքսի վարորդներ, առիթից օգտվելով, ուղևորափոխադրումը 500 դրամից դարձրել են 1000 դրամ: Հայտարարությունում ասվում է, որ ուևորափոխադրամիջոցը պատկանում է ԱԺ պատգամավոր, Ծառուկյան խմբակցության ղեկավար Գագիկ Ծառուկյանի Մուլտի ավտո տրանս ՍՊԸ-ին: Վարդան Մակինյանը գրում է, որ խնդրի մասին տեղեկացրել է ՀՀ Տրանսպորտի, կապի եւ տեղեկատվկան տեխնոլոգիաների նախարարության տրանսպորտի վարչությանը, վերջինիս խոստացել են 2 ժամվա ընթացքում զանգահարել եւ նորություն ասել: Վարդան Մակինյանը չարենցավանցիներին առաջարկում է հարցի լուծման համար ժամը 18:00-ին հավաքվել եւ փակել Սևան-Երևան միջպետական ճանապարհը: «Հորդորում եմ ՀՀ ոստիկանությանը՝ աջակցել մեր ակցիային, այսինքն, մեր անվտանգության երաշխավորը լինել, իսկ ընկերներիս կխնդրեմ այս գրառման մեկնաբանություններում ԹԵԳ անել պատկան կառույցներին եւ լրագրողներին»,-գրել է Վարդան Մակինյանը: Հայտնում է armtimes.com-ը