Հանգած հրաբուխները չեն արթնանա, եթե բզբզացողներ չլինեն
Վարչապետի թեկնածու Սերժ Սարգսյանն այսօր Ազգային ժողովում ամփոփիչ ելույթով շնորհակալություն հայտնեց բոլոր ելույթների համար, չնայած շատ մտքերի հետ համաձայն չէ: Սերժ Սարգսյանն ասաց, որ ընդդիմադիրները խոսում են, որ Հայաստանի երրորդ նախագահի տարիներին եղել են այսինչ խնդիրները, տնտեսական ցուցանիշների սելեկտիվ, կոպիտ խախտումներով թվեր են ներկայացվում: Նպատակը, ըստ Սարգսյանի, այն է՝ ցույց տան՝ իբր անցած 10 տարիներն անարդյունավետ էին, ամեն ինչ վատ է եղել, հետւաբար, ո՞նց կարող է ամեն ինչ լավ լինել: Սա, ըստ Սարգսյանի, պարզունակ մարտավարություն է. «Ելույթներում քննադատություններ կային, որ արդար չեն. ժամանակն ամեն ինչ ցույց կտա: Փորձ է արվում սևացնել կոալիցիայի վարչապետի թեկնածուին, թե ամեն ինչ վատ է արել այս 10 տարիների ընթացքում, հետո ո՞նց կարող է լավ անել. պարզունակ մարտավարություն է: Մենք տնտեսական ճգնաժամեր, պատերազմական իրավիճակներ ենք հաղթահարել ու այդ պայմաններում կարողացել ենք առաջընթաց ապահովել, բարեփոխումներ իրականացնել»: Անդրադառնալով իր հասցեին հնչած քննադատություններին՝ Սարգսյանն ասաց. «Բա հո ձեռքները ծալած չե՞ն նստելու: Հայցում եմ նաև ընդդիմության քվեն, որը կլինի հանուն քաղաքական տրամաբանության»: Սերժ Սարգսյանը դիմեց «Ելք» խմբակցության պատգամավոր Արամ Սարգսյանին: «Ես Արամ Սարգսյանի նկատմամբ ունեմ առանձնահատուկ վերաբերմունք, որևէ մեկը Սերժ Սարգսյանի չափ տեղեկացված չէ Վազգեն Սարգսյանի ծրագրերի, հույզերի, երազանքների մասին ու որևէ տեղ որևէ մեկը չշահարկի այս հանգամանքը»: Այնուհետ նա դիմեց Էդմոն Մարուքյանին. «Այսօր ՀՀ-ում չկա նկարի իշխանություն, կա քաղաքական ուժի իշխանություն... Որպեսզի ապրենք լուսավոր Հայաստանում, որպեսզի ապրենք բարգավաճ Հայաստանում, որպեսի ապրենք արդար Հայաստանում, իրոք անհրաժեշտ է, որ ՀՀ-ում հանգած հրաբուխները չարթնանան, իսկ չեն արթնանա, եթե բզբզողներ չլինեն»,- ելույթը եզրափակեց վարչապետի թեկնածու Սերժ Սարգսյանը:
Հետևեք մեզ Viber-ում
