Մոսկվայի գեղեցիկ «դաբրոն»
Ռուսաստանի ԱԳՆ-ն հրապարակել է մի տեսագրություն, որում արտգործնախարար Սերգեյ Լավրովը, պատասխանելով հայ լրագրողի հարցերին, խոսել է վերջին տասը տարիներին հայ-ռուսական հարաբերություններից, ղարաբաղյան խնդրից և Եվրամիության և Եվրասիական միության հետ Հայաստանի համագործակցությունից: Լավրովը, պատասխանելով, հայ լրագրողի հարցին, թե արդյոք նա կիսում է տարածված այն կարծիքը, որ 2011թ. Կազանյան գագաթնաժողովը կարող էր բեկումնային լինել ղարաբաղյան խնդրի կարգավորման համար և արդյոք ակնկալում է առաջխաղացում բանակցություններին, ասել է, որ իսկապես սպասումները Կազանյան գագաթնաժողովից մեծ էին, ռուսական կողմը մյուս երկու համանախագահների՝ Ֆրանսիայի և Միացյալ Նահանգների համաձայնությամբ պատրաստել էր փաստաթուղթ, որը կողմերը պետք է ստորագրեին, սակայն վերջին պահին նոր մեկնաբանություններ ու հարցեր են ծագել և փաստաթուղթը չի ստորագրվել: - «Այդպես լինում է», - հավելել է Լավրովը, նկատելով, որ սա ողբերգություն չէ և աշխատանքները շարունակվում են ամեն դեպքում: ՌԴ արտգործնախարարի խոսքով, կազանյան փաստաթղթում տեղ գտած կետերը այսօր էլ ընդունելի են կողմերի համար, թեև, ըստ Լավրովի, համանախագահները նաև նոր գաղափարներ են առաջարկել վերջին տարիներին և նոր փաստաթուղթը նաև այդ գաղափարների շուրջ պետք է ձևավորվի: «Ամենակարևորն այն է, որ կողմերը հրաժարվեն անվստահությունից, որը դեռ երբեմն դրսևորվում է բանակցությունների ընթացքում, և կենտրոնանան իրատեսական գաղափարների վրա, որոնք առկա են», - ընդգծել է Լավրովը: «Ի սկզբանե կողմերը համաձայն են կարգավորման շուրջ համանախագահների ներկայացրած փաստաթղթի նախագծի հետ, մնում է, որ այդ համաձայնությունը նաև փաստաթղթում ամրագրվի», - ասել է Լավրովը, հավելելով, որ լավատես է խնդրի կարգավորման հնարավորության հարցում: Այնուհետև Լավրովն անդրադարձել է վերջին տասը տարիներին հայ-ռուսական հարաբերություններին՝ նշելով, որ ակտիվ զարգացել են և դրան նպաստել է նաև Հայաստանի անդամակցությունը Եվրասիական միությանը: Լավրովը դրական է գնահատել Եվրասիական միության անդամ Հայաստանի համագործակցությունը Եվրամիության հետ: Նա նկատել է, թե իբր Եվրամիությունը դեմ է, որ հետխորհրդային երկրները հարաբերությունները ակտիվ զարգացնեն և՛ Եվրամիության, և՛ Ռուսաստանի հետ, և հետխորհրդային երկրներին պարբերաբար «կա՛մ -կա՛մ» ընտրության առջև է կանգնեցնում, ինչը սխալ է, և այս առումով ճիշտ համարել Հայաստանի մոտեցումը: Հայաստանում երեկ նախագահի պաշտոնի ստանձնման օրը Ռուսաստանի ԱԳՆ-ի կայքում Լավրովի հարցազրույցի հրապարակումը, թերևս, նախ՝ վկայում է այն մասին, որ Մոսկվան հրապարակային աջակցություն է հայտնում Սերժ Սարգսյանի կայացրած որոշումներին: Լավրովը, ըստ էության, արտաքին քաղաքական, ինչպես նաև Լեռնային Ղարաբաղի հարցում պաշտոնական Երևանի քաղաքականության ճշգրիտ լինելն է արձանագրել: Մոսկվան ցույց է տալիս, որ գոհ է Հայաստանի՝ «և-և»-ի քաղաքականությունից և ԵՄ-Հայաստան հարաբերություններում Մոսկվային նյարդայնացնող որևէ խնդիր չկա: Բայց մյուս կողմից՝ Մոսկվայի արձագանքը նաև ազդակ է ԵՄ-ին այն մասին, որ որքան էլ հետխորհրդային երկրների հետ հարաբերությունները կարգավորեք՝ նրանք մեզնից «հետ չեն կանգնելու»: Ինչ վերաբերում է ղարաբաղյան խնդրի վերաբերյալ Լավրովի մեկնաբանություններին, ապա` բացասականն այն է, որ Ռուսաստանի արտգործնախարարը չի մատնանշում համաձայնությունների, պայմանավորվածությունների հասնելու հարցում հիմնական խոչընդոտին՝ Ալիևի քաղաքականությանը: Թամար Բագրատունի
Հետևեք մեզ Viber-ում
