Թուրք-ֆրանսիական սկանդալի շարունակությունը. «Այդ խելքդ պահիր քեզ». էրդողանը՝ Մակրոնին

Ապրիլի 8-ին Թուրքիայի  նախագահ Ռեջեփ Թայիփ Էրդողանը իշխող «Արդարություն և զարգացում» (ԱԶԿ-AKP) կուսակցության՝ Վանում կայացած ժողովի ժամանակ կոշտ հայտարարություններ է արել Ֆրանսիայի նախագահ Էմմանուել Մակրոնի հասցեին։ Ermenihaber-ի փոխանցմամբ, Թուրքիայի և Ֆրանսիայի միջև լարվածություն է առաջացրել այն բանից հետո, երբ Մակրոնը պատրաստակամություն է հայտնել միջնորդի դեր ստանձնել «Սիրիայի հյուսիսում տեղակայված «Սիրիայի դեմոկրատական ուժերի» (ՍԴՈՒ-SDG) և Անկարայի միջև: «Բոլոր նրանց, ովքեր դուրս են եկել մեր դեմ և մեզ հետ խոսում են ահաբեկիչների բերանով, ասում ենք, որ ձեր ճանապարհը դժոխքն է։ Նրանք Ելիսեյան պալատում հյուրընկալում են ահաբեկիչներին և դրանից հետո կանգնում, ինձ խելք են սովորեցնում։ Այդ խելքդ պահիր քեզ: Եթե չգիտես, ապա իմացիր, որ այդ ահաբեկչական կազմակերպությունները քեզ էլ են զզվեցնելու»,-ասել է Էրդողանը։ Վերջինս նաև Ֆրանսիային մեղադրել է այն բանում, որ ֆրանսիական մի ընկերություն նախկինում օգնել է Սիրիայի դեմոկրատական ուժեր»-ին Սիրիայում թունելներ և խրամատներ կառուցել։