Վիգեն Սարգսյանը Սերժ Սարգսյանի մասին
«Արմենիա» հեռուստաընկերության «Ռ-Էվոլյուցիա» հաղորդման եթերում պաշտպանության նախարար Վիգեն Սարգսյանը` անդրադառնալով ԶՈՒ արդիականացման 7-ամյա ծրագրի հույժ գաղտնի կետերին՝ ասել է, որ հոկտեմբեր ամսին գերագույն գլխավոր հրամանատարը հանձնարարեց մշակել ԶՈՒ յոթնամյա արդիականացման ծրագիր, նշեց հստակ ժամկետներ, և իրենք այդ ժամկետներում աշխատանքը կատարեցին: Անդրադառնալով ներքաղաքական խնդիրներին` Վիգեն Սարգսյանը պատասխանել է հարցին, թե ինչի՞ շնորհիվ է Սերժ Սարգսյանը կարողացել այդքան տարբեր ու կարևոր պաշտոններ զբաղեցնել: «Կարծում եմ, որ բնավորության հակադիր գծերի շատ յուրահատուկ համադրման շնորհիվ, որոնք թույլ են տվել ամբողջական ընկալել և ներազդել քաղաքական դաշտի վրա: Նա մի կողմից իմ իմացած ամենահամբերատար մարդկանցից մեկն է, որը պատրաստ է երկար գործընթացների, դրական արդյունքի հասնելու համար, մյուս կողմից որևէ կերպ չի նվազեցնում իր էմոցիոնալ տրամադրվածությունը և մարդկային վերաբերմունքը ամենատարբեր խնդիրների լուծմանը: Սովորաբար դրանք հակադիր բևեռներ են, մարդ կամ համբերատար, հանգիստ բնավորություն է ունենում, կամ էմոցիոնալ, իր մոտ դա համադրվում է»: Նախարարը պատմել է, որ Սերժ Սարգսյանը շատ խստապահանջ է առաջին հերթին իր և իր թիմի նկատմամբ: Ըստ նրա` դա առաջին հերթին երևում է նույնիսկ աշխատանքային օրացույցից, որն այս տասը տարիների ընթացքում եղել է գերծանրաբեռնված: «Որևէ միջազգային այց 48 ժամից ավել չի տևել` ճանապարհը ներառյալ: Որևէ օր չի եղել, որ ես հիշեմ տասը տարվա մեջ, որ նա բացակայի աշխատանքից վատ զգալու, առողջական խնդրի պատճառով: Որևէ տարի չի եղել, որ տասը-տասներկու օրից ավել արձակուրդ գնա, այդպես նաև թիմակիցները: Եվ դա, իհարկե, ավելացրել է արդյունավետությունը, որովհետև շատ ժամանակ է հատկացվել բուն աշխատանքին: Երկրորդ կարևոր հանգամանքն այն խստապահանջությունն է` մանրուքների նկատմամբ գերուշադրությամբ: Անհնար է նախագահի սեղանին դրվի մի փաստաթուղթ, նույնիսկ եթե կազմված է չափից ավելի մանրամասներով, ենթադրենք` նույնիսկ նախագահի մակարդակի չէ, որ ինքն առանց կարդալու վերադարձնի: Ցանկացած մարդ, ով ունի ասելիք և ցանկություն, ես չեմ հիշում մի դեպք, որ ինքը մերժի լսել` թե՛ թիմակցի, թե՛ ընդդիմախոսի մոտեցումները»:
Հետևեք մեզ Viber-ում
